Արամ Մանուկյան. Անկախություն ձեռք բերած սերունդը դեռ պայքարում է անկախության համար

Մենք անկախությունը ձեռք ենք բերել ոչ մեր ցանկությամբ, այլ մեր սերունդների, մեր նախնիների պատգամով, ձեռք ենք բերել զրկանքներով, դժվարություններով, բայց ձեռք ենք բերել ազգովի։ Նման կարծիք Լուրեր.com–ի հետ զրույցում հայտնեց ԱԺ ՀԱԿ պատգամավոր Արամ Մանուկյանը։

 «2 միլիոնից ավել մարդ իր քվեարկությամբ ստեղծեց այն երկիրը, որ կոչվում է Հայաստան։ Այս անկախությունը բերեց ոգևորություն, բերեց հաղթանակներ Ղարաբաղում, երկիրը դարձավ ժողովրդավար, հարյուրավոր լրատվամիջոցներ, հարյուրավոր կուսակցություններ, հազարավոր հասարակական կազմակերպություններ ստեղծվեցին։ Ձեռք բերվեց այն ամենը, ինչ անհրաժեշտություն համարեց մի ժողովուրդ, ով ստեղծում էր Հայաստանը։ Հայաստանը դարձավ միջազգային կառույցների անդամ։ Սեփականաշնորհվեցին բնակարանները և տրվեցին քաղաքացիներին։ Երկիր կառուցվեց։ Այսպես մտանք մյուս երկրների շարքերը, մեր դրոշը բարձացվեց ՄԱԿ–ում։ Մեր հիմնը տարբեր երկրներում հնչեցվեց, դեսպանատներ ունեցանք»։

Արամ Մանուկյանը նշեց, որ հատկապես վերջին տաս տարիներին առաջ են եկել անկախությանը խանգարող գործիքներ։

«Հատկապես վերջին տաս տարիներին՝ կաշառքը, կոռուպցիան, մոնոպոլիան, անգրագետների պառլամենտ մտնելը, փողով դեպուտատ դառնալը, ախպերության հաշվին մինիստր դառնալը բերեցին հիասթափության, որը անկախությանը խանգարող գործիքներից է։ Անկախության համար վնասարարություն է դա։ Երբ երկրի ներքին ու արտաքին իմունիտետն է թուլանում։ Երբ քաղաքացին ոչ թե հավատում է իր ղեկավարին, այլ զզվում է իր ղեկավարից, ուզում է ազատվել նրանից»,–ասաց Մանուկյանը։

Մանուկյանի խոսքերով`սկսվեց ազատ խոսքը, միտքը ճնշվել, բանտերում մարդիկ հայտնվեցին և սկսեց արտագաղթ. «Արտագաղթ, որն ամենածանր դրսևորումն է, դրսից Հայաստանը կորցրեց ընկերներ, բարեկամ երկրներ, սկսեց թուլանալ, իր սեփականությունները սկսեց այլ երկրներին վաճառել։ Սկսեցին ճնշել այն ժողովրդին, որն անկախություն էր կերտել, ու այս ժողովուրդն արդեն նախընտրում է Հայաստանից դուրս ապրել։ Գնում են շատ, գնում են արագացնող տեմպերով, գնում են հիասթափված»։

Մանուկյանը նշեց նաև, որ լայն առումով կա անկախություն, բայց քաղաքացիների հավատն իր վաղվա օրվա նկատմամբ պակասում է. «Փառք Աստծո, կան հասարակական, քաղաքացիական շարժումներ, քաղաքական ուժեր, կա այն սերունդը, որն անկախություն է ձեռք բերել և այդ սերունդը դեռ պայքարում է անկախության համար։ Սա մի գործընթաց է, որի մեջ ենք մենք այսօր»։

Գայանե Համբարձումյան