Մենք տեսնում ենք մարդկանց տեղաշարժը. պատերազմից առաջ էլ, հիմա էլ գիտենք, թե ինչ է կատարվում Արցախում. Ալիև

Ադրբեջանը ամեն օր մոնիտորինգ է անցկացնում Լաչինի միջանցքում և լիարժեք տեղեկատվություն ունի, թե քանի մեքենա է անցնում դրանով, ասել է Ադրբեջանի նախագահ Իլհամ Ալիևը:

«Մենք ամեն օր մոնիտորինգ ենք անցկացնում, թե քանի մեքենա է անցնում Լաչինի միջանցքով, քանիսը` հեռանում», - ասել է Ալիևը պետական ​​«AzTV»-ին տված հարցազրույցում:

Նա պնդում է, թե ներկայումս Արցախում ապրում է առավելագույնը 25 հազար հայ: «Այնտեղ բնակվող մարդկանց իրական թիվը 25 հազար մարդ է: Այլ թվեր նույնպես հնչեցին, պատերազմից հետո ավելի քան 50 հազար մարդ է վերադարձել: Թերեւս, վերադառնալ չի նշանակում այնտեղ մնալ: Նրանք վերադարձան, իսկ հետո գնացին: Երկրորդ, մենք ունենք տարբեր սարքավորումներ և արբանյակներ: Մենք գիտենք այնտեղի մեքենաների քանակը, տեսնում ենք մարդկանց տեղաշարժը: Մենք ունենք բավական բազմազան տեղեկություն, թե ինչ է տեղի ունենում այնտեղ: Պատերազմից առաջ էլ գիտեինք, թե ինչ է կատարվում այնտեղ: Բնականաբար, մենք գիտենք, թե ինչ է կատարվում այնտեղ այժմ», - ասել է Ալիևը:

Նա նշել է, որ Ադրբեջանը վերահսկում է նաև օտարերկրյա մեքենաները, որոնք Արցախ են մտնում Լաչինի միջանցքով: 

«Ամեն օր հեռացող մեքենաների թիվն ավելի մեծ է, քան մուտք գործողների քանակը: Որտե՞ղ է տրամաբանությունը, որ 25 հազար մարդու համար կարգավիճակ ստեղծվի», - ասել է Ալիևը: