Նաիրա Զոհրաբյան. Կան մարդիկ, կան ուժեր, որոնք վեր են Սահմանադրությունից և օրենքներից

«Ինձ մոտ տպավորություն է ստեղծվում, որ անկախության օրը մեզ մոտ վերածվում է կենաց ասելու օրվա։ Լուրեր.com–ի հետ զրույցում խոսելով Անկախության տոնի մասին`ասաց ԲՀԿ խմբակցության քարտուղար Նաիրա Զոհրաբյանը։

Նրա խոսքերով, երբ անընդհատ կրկնվում են նույն նախադասությունները՝ «անկախությունը մեզ համար բարձրագույն արժեք է», և այլն և այլն, ապա այս շաբլոն նախադասություններից օրվա խորհուրդը կորցնում ենք։

Զոհրաբյանի կարծիքով`ասել, որ ամեն ինչ արել ենք ու անում ենք, որ արժանի լինենք մեր իսկ անկախությանը, սխալ է. «Այո՛, անկախությունը բարձրագույն արժեք է, բայց ես չեմ ուզում այսօր կենաց ասել, ինչպես բազմաթիվ անգամներ լսում ենք»։

Խոսելով բացթողումների և ձեռքբերումների մասին՝ Զոհրաբյանը նշեց, որ մեր կարևորագույն ձեռքբերումներից մեկը համարում է արցախյան հաղթանակը. «Այստեղ է, որ մենք լրջագույն խնդիրներ ունենք լուծելու, որպեսզի այդ հաղթանակը ամրագրվի նաև միջազգայնորեն։ Ես կարևորագույն ձեռքբերում կհամարեի նաև անկախության տարիներին Չորրորդ իշխանության կայացումը, երբ տոտալիտար հասարակարգի ճիրաններից լսվեց մամուլի ձայնը։ Ցավոք սրտի, վերջին տարիներին էականորեն դեգրադացվել է մեզանում ազատ խոսքի և ազատ մամուլի ընկալումը և ես շատ ցավում եմ, որ անկախ տարիների այդ ձեռքբերումը՝ Չորրորդ իշխանությունը, այսօր մեզանում թե՛ օբյեկտիվ, թե՛ սուբյեկտիվ պատճառներով դեգրադացվում է»։

Զոհրաբյանը նշեց նաև, որ այսքան տարիների ընթացքում մենք չունեցանք արդար դատական համակարգ։

«Մենք չկարողացանք ունենալ արդար դատական համակարգ։ Մեր քաղաքացին այդպես էլ չկարողացավ և առ այսօր չի հավատում իր երկրի արդարությանը, արդարադատությանը։ Սա լրջագույն ճգնաժամ է։ Երբ  ես դրսում հանդիպում եմ մեր համերկրացիներին, որոնք հատկապես վերջին տարիներին են լքել Հայաստանը, նույնիսկ մարդիկ, որոնք Հայաստանում բարեկեցիկ, նորմալ կյանքով ապրել են, նրանք որպես գերագույն խնդիր, որպես երկրից հեռանալու պատճառ նշում են, որ երկրում չկա արդարություն։ Այս գերակա խնդիրն է, որ ոչ միայն այս տարիներին չկարողացանք լուծել, այլև այդ արդարության ճգնաժամը ավելի է խորանում»,– ասաց նա և նշեց, որ դրա պատճառը շատ պարզ է. «Երկրում ընտրովի են գործում օրենքները, և ընտրովի է գործում Սահմանադրությունը»։

Նրա խոսքերով`կան մարդիկ, կան ուժեր, որոնք վեր են Սահմանադրությունից, օրենքներից։ Իսկ իրավիճակը շտկելու համար, ըստ Զոհրաբյանի, շատ բան պետք չէ. «Պետք է քաղաքական կամք՝ անցկացնելու ազատ ընտրություններ, քաղաքական կամք, որպեսզի ունենանք անկախ դատարան, որպեսզի դատարանները չլինեն իշխանության կամ գործադիրի կցորդը, քաղաքական կամք, որ չճնշեն ազատ մամուլին և մամուլը չդարձնեն այս կամ այն քաղաքական ուժի, իշխանության այս կամ այն ներկայացուցչի կցորդը։ Սա է խնդիրը, և մենք պետք է կարողանանք լուծել այն, որպեսզի ունենանք իրապես այնպիսի Հայաստան, որն իր արժանի տեղը կգրավի քաղաքակիրթ երկրների շարքում»։

Գայանե Համբարձումյան