Հակոբ Արշակյանի արժանի հետնորդը. Չոբանյանի «կայսերական» պլաններն ու իրականությունը

Արդեն երեք ամիս է, ինչ Հակոբ Արշակյանին ԲՏԱ նախարարությունում փոխարինել է Տավուշի նախկին մարզպետ Հայկ Չոբանյանը: Ինչո՞վ է վերջինս հասցրել աչքի ընկնել այս ամիսների ընթացքում: Ըստ էության, վերջինս ամբողջությամբ շարունակել է իր նախորդի գործելաոճը: Նախ և առաջ Չոբանյանը հայտնվեց մամուլի ուշադրության կենտրոնում, քանի որ ԱԱԾ հետ մի նախագիծ էր հեղինակվել, ըստ որի` պաշտոնյաների գործուղումների մասին տեղեկությունը համարվելու է պետական գաղտնիք և չի հրապարակվելու:

Պաշտոնը ստանձնելուց հետո ինչպես և Հակոբ Արշակյանը Չոբանյանը նույնպես հայտարարել էր, որ իր նպատակը ռազմաարդյունաբերական կառույցի զարգացումն է, սակայն, ինչպես և իր նախորդը նա էլ մինչ օրս որևէ գործնական քայլ այդ ծրագրի իրագործման ուղղությամբ չի արել: Չոբանյանն աչքի է ընկնում անիրատեսական խոստումներով։ 2019թ․ մայիսի 17-ին Իջեւանի տարածաշրջանի Ենոքավան գյուղում, որպես մարզպետ իր պաշտոնավարման 100 օրվա կապակցությամբ մամուլի ասուլիսի ժամանակ նա հայտնել է 5 տարում արտերկրից 5 հազար հայ ընտանիք Տավուշի մարզ վերաբնակեցնելու, 2 տարում՝ 2019-2021թթ․ Տավուշի մարզում չօգտագործվող հողեր չթողնելու իր ծրագրերի մասին։ Այժմ հարց է առաջանում՝  Տավուշի նոր մարզպետը կիրականացնի՞ այս տարի 5 հազար հեկտար անջրդի հողերը ոռոգելի դարձնելու Հայկ Չոբանյանի խոստումը:

Ինչպես և Հակոբ Արշակյանը՝ Չոբանյանը նույնպես սիրում է հանրային քննարկումներ անցկացնել զանազան ՀԿ-ների հետ, սակայն, ուշագրավն այն է, որ այդ ՀԿ-ները, որպես կանոն, սորոսական են: Զուգադիպությո՞ւն է, թերևս` ոչ: