Ամեն ամիս ԱՄՆ-ն 40 մլրդ դոլար է թողարկելու. Բրազիլիան դժգոհում է

Ամենավերջին և աղմկահարույց վիճաբանություններից մեկը արժույթային միջոցների տեղաբաշխումն է, որն ընթանում է ԱՄՆ պահուստային համակարգի և ԵԿԲ-ի միջև:

Մի քանի օր առաջ ԱՄՆ-ի պահուստային ֆոնդից հայտնել են, որ սկսում են քանակական մեղմացումների թվով երրորդ ծրագիրը կամ, այսպես ասած, QE3-ը: Ծրագիրն արդեն ստացել է իր ոչ պաշտոնական անվանումը՝ QE3:

Տվյալ ճանապարհն առաջին անգամ ընտրել են ԱՄՆ-ի Ազգային պահուստային համակարգը և Եվրոպական կենտրոնական բանկը: ԱՄՆ ազգային պահուստային համակարգը հիփոթեքային արժեթղթեր գնելու նպատակով ծախսելու է 40 մլրդ ԱՄՆ դոլար մինչև այն ժամանակ, երբ երկրում տնտեսությունը չկարգավորվի: Ամեն ամիս շուկա են ուղղվելու 85 մլրդ ԱՄՆ դոլարի ընդհանուր արժեքով ակտիվներ: Բացի դա, ԱՄՆ-ի ֆինանսական կարգավորիչները կշարունակեն մինիմալ տոկոսադրույքի քաղաքականությունը մինչև 2015թ.:

«ԱՄՆ-ի՝ ամենամսյա 40 մլրդ դոլարի թողարկումը վատ ազդեցություն կունենա արժութային շուկայի վրա: Ամենագլխավոր հարցն այն է, թե ինչպես կարձագանքեն մնացած երկրների կենտրոնական բանկերը»,- Bloomberg TV ուղիղ եթերով հայտնել է Standart Chartered-ի արժութային վերլուծաբան Կալում Հենդերսոնը:

ԵԿԲ-ն իր հերթին հայտնել է, որ պատրաստ է գնել ճգնաժամի մեջ գտնվող երկրների պետական պարտատոմսերը, իսկ ԵԿԲ նախագահ Մարիո Դրագին հայտնել է, որ եվրոյին մահացու վտանգ է սպառնում, և եթե նման կարգավորիչ միջոցներ չկիրառվեն, ապա եվրագոտու ապագան մեծ վտանգի առաջ է կանգնելու:

Զարգացող երկրները անհանգստացած են ԱՄՆ ազգային պահուստային համակարգի և ԵԿԲ-ի վարած քաղաքականությունից, քանի որ դրա հետևանքով ԱՄՆ դոլարը դեվալվացիայի կենթարկվի (կարժեզրկվի մնացած արժույթների համեմատ), ինչը բացասական ազդեցություն կունենա զարգացող երկրների մրցունակության վրա:

ԱՄՆ ազգային պահուստային համակարգի հայտարարությունից հետո բրազիլական ազգային արժույթը թանկացել է 0.7%-ով, մեքսիկականը՝ 2.7%-ով, լեհականը՝ 4.3%-ով, իսկ կորեականը՝ 1.6%-ով:

Երկուշաբթի օրը Բրազիլիան իրենց արժույթի աճը կանխելու միջոցների է դիմել: Բրիտանական The Financial Times-ին Բրազիլիայի ֆինանսների նախարար Գիդու Մանտեգան հայտնել է, որ ԱՄՆ-ի բարեփոխումների հետևանքով կարող է սկսվել արժութային նոր պատերազմ, որը մեծ վնաս կհասցնի համաշխարհային տնտեսություններին:

«Անհրաժեշտ է հասկանալ, որ այդ քայլն իր հետևանքներն է ունենալու»,- նշել է նախարարը: Ըստ Մանտեգանի՝ ԱՄՆ-ն դիմել է դոլարի արժեզրկման, որպեսզի կարողանա մեծացնի ԱՄՆ-ի արտահանման ծավալները:

Հարավային Կորեան, Թայլանդը, Սինգապուրը և Ֆիլիպինները նույնպես հայտնել են, որ անմիջապես կմիջամտեն, եթե կապիտալի հոսքը մեծ մասշտաբներ ընդունի: