Հանրապետական մաղթանք՝ նվիրված Անկախության 21-րդ ամյակին

Սեպտեմբերի 21-ին Հայաստանի Հանրապետության Անկախության 21-րդ ամյակի առիթով Մայր Աթոռ Սուրբ Էջմիածնում տեղի է ունեցել Հանրապետական մաղթանքի արարողություն:

Ինչպես հայտնում են Մայր Աթոռ Սուրբ Էջմիածնի տեղեկատվական համակարգից, եկեղեցականների թափորը Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսին ուղեկցել է Մայր տաճար, որտեղ Իջման Սբ. Սեղանի առջև կատարվել է գոհաբանական մաղթանք:

Արարողության ընթացքում, սուրբգրային ընթերցումներից հետո, Վեհափառ Հայրապետը ծնրադիր ընթերցել է «Գոհանամք զքէն» աղոթքը' Աստծուց հայցելով անսասանություն, պայծառություն ու բարօրություն հայոց անկախ պետության համար:

Այնուհետև եկեղեցական դասն օրհնությամբ մաղթել է, որ Աստված իր Ամենախնամ Ս. Աջի հովանու ներքո պահի ու պահպանի Հայաստանի Հանրապետությունը:

Հանրապետական մաղթանքի ավարտին Նորին Սրբությունն իր պատգամն է բերեց համայն հայ ժողովրդին: Անդրադառնալով անկախության 21 տարիների ընթացքում հայ ժողովրդի կրած դժվարություններին' Վեհափառ Հայրապետը նշել է, որ, հակառակ բոլոր փորձություններին, երբեք չընկճվեց հայորդու ազատատենչ ոգին, և հայ ժողովուրդը շարունակեց տոկալ հայրենիքի ու պետության համար իր պայքարում: Իր խոսքն ուղղելով ինչպես հայրենիքում, այնպես էլ սփյուռքում ապրող հայ ժողովրդի զավակներին' Ամենայն Հայոց Կաթողիկոսն ասել է, որ պետք է միասնական կամքով կերտել մեր երազների հայրենիքը, որը պիտի լինի յուրաքանչյուր հայորդու հպարտությունը և յուրաքանչյուր հայ զավակի տունը:

Նորին Սրբությունը հորդորել է չտկարանալ ներկայիս կյանքի դժվարությունների առջև, զորեղ պահել հողի ու հայրենիքի հանդեպ սերը, որն անպարտելի ուժ է և կարող է շենություն բերել մեր հայրենիքին, հայ օջախներին ու հայ կյանքին: