Գագիկ Գինոսյան. Մտավորականությունը պետք է լինի ճարտարապետ, իշխանությունը՝ աշխղեկ

Մեր հանրապետության անկախությունը արդեն 21 տարեկան է։ Թե ինչ ձեռքբերումներ ու բացթողումներ է ունեցել մեր երկիրը այս 21 տարիների ընթացքում, իր տեսակետն արտահայտեց արցախյան պատերազմի մասնակից, ազգային պարարվեստի երախտավոր գործիչ, «Կարին» ազգագրական պարախմբի ղեկավար Գագիկ Գինոսյանից։

- Ձեռքբերումներն ու թերացումները շատ են, մի շնչով դժվար է այդ ամենին ձևակերպում տալ։ Կարող եմ առանձնացնել գլխավոր ձեռքբերումները. Արցախի ազատագրումն է, որ տեղի ունեցավ անկախության տարիներին, և ազգային բանակը ՝ իր թերություններով և խնդիրներով հանդերձ։

Իսկ բացթողումները շատ են՝ թե ազգային գաղափարախոսությունը, թե քարոզչամեքենայի տձևությունը, թե մշակութային ասպարեզի թերությունները։ Ծաղր է, երբ ՀՀ առաջին նախագահը հայտարարում է, որ ազգային գաղափարախոսությունը կեղծ քաղաքական կատեգորիա է։

Ուղղակի կցանկանայի սահմանել անկախության բանաձևը։ Անկախությունը բոլոր ազգերի համար բացարձակ արժեք է և այդ արժեքը չի կարող նպատակ լինել։ Քանի որ նպատակը ոչ թե անկախությունն է, այլ անկախության ճանաչումը, որը ազգի բնականոն զարգացման, արժանապատիվ ազգի և լիարժեք ապագա կերտելու միակ միջոցն է։

-Իսկ, ըստ Ձեզ , ո՞րն է այդ ամենը շտկելու ուղին։

-Այս հարցի շուրջ կարելի է ատենախոսություն գրել։ Վստահ եմ միայն՝ կա մի օղակ, որը պետք է հստակ գործի՝ անկախ նրանից, որ դրան փորձում են խանգարել տարբեր իշխանություններ։ Այդ օղակը մտավորականությունն է։ Մենք պարտավոր ենք կրկին կերտել այն մտավորականությունը, որ պիտի ստեղծի ազգային արժեհամակարգ։ Պիտի վեր բարձրացվի վերկուսակցության գաղափարը։ Այդ ամենի շնորհիվ հետագայում պիտի կառուցվի այն անկախ պետականությունը, որը հենց վերոհիշյալ արժեհամակարգի ստեղծման միակ ուղին է։ Հենց այն կարող է ազգը դարձնել կենսունակ բոլոր արհավիրքների և պատերազմների դեպքում։

Հայ մտավորականությունը նույն ճարտարապետն է, որի աշխղեկը՝ իշխանությունը, պիտի իրականացնի ճարտարապետի նախագծերը։
 

 Ռ.Հակոբյան