Թուրքական ռեժիմը այլ լեզու չի հասկանում․ «Կրակի երեխաներ» ահաբեկչական կազմակերպությունը ստանձնել է Թուրքիայում բռնկված հրդեհների պատասխանատվությունը

Թուրքիայում ահաբեկչական ճանաչված «Կրակի երեխաներ» կազմակերպությունը ստանձնել է երկրում անտառների հրկիզման պատասխանատվությունը: Այս մասին հայտնում է թուրքական Yeni Şafak թերթը: Թերթի փոխանցմամբ՝ «Կրակի երեխաներ» ահաբեկչական կազմակերպությունը կապված է Քրդստանի աշխատավորական կուսակցության հետ, որն արգելված է և ահաբեկչական է ճանաչվել Թուրքիայում, ԱՄՆ-ում և ԵՄ որոշ երկրներում: Գրոհայինները ստանձնել են անտառային հրդեհների պատասխանատվությունը և այդ մասին հայտնել են սոցիալական ցանցերում: Ըստ կազմակերպության՝ «թուրքական ռեժիմը այլ լեզու չի հասկանում», ուստի նրանք որոշել են «այն կրակով ծնկի բերել»:

Ավելի վաղ հաղորդվել էր, որ Թուրքիայի արտակարգ իրավիճակների ծառայությունները կարողացել են վերահսկողություն սահմանել երկրում 107 անտառային հրդեհների վրա: Ընդհանուր առմամբ՝ չորեքշաբթի օրվանից հրդեհի օջախներ են գրանցվել Թուրքիայի 32 նահանգներում: Հրդեհների հետևանքով՝ զոհվել է վեց մարդ:

Մինչ այդ, ուրբաթ օրը Թուրքիայի նախագահ Ռեջեփ Թայիփ Էրդողանը հորդորել էր սպասել իշխանությունների կատարած հետաքննության արդյունքներին երկրում միաժամանակ մի քանի ուժեղ հրդեհների բռնկման պատճառների վերաբերյալ: