ՄԱԿ-ը դատապարտել է Վրաստանի բանտերում կալանավորներին տանջելու դեպքերը

ՄԱԿ-ի Մարդու իրավունքների հարցերով գերագույն հանձնակատար Նեվի Փիլեյը դատապարտել է Վրաստանի բանտերում, այդ թվում՝ անչափահասների մեկուսարաններում կալանավորներին տանջելու դեպքերը և նրանց նկատմամբ ցուցաբերված կոպիտ վերաբերմունքի այլ ձևերը: Դրանով նա նշել է, որ այդ փաստերից մի քանիսը արձանագրված են այս շաբաթ լույս աշխարհ եկած առնվազն չորս տեսանյութում, հայտնում է ՄԱԿ-ի պաշտոնական կայքը:

ՄԱԿ-ի գլխավոր իրավապաշտպանը կոչ է արել Վրաստանի իշխանություններին՝ անմիջապես հետաքննել վրացական բանտերում բռնություն կիրառելու բոլոր դեպքերը և քրեական պատասխանատվության ենթարկել մեղավորներին. «Մենք կառավարությանը կոչ ենք անում ապահովել, որ Մարդու իրավունքների խախտման մասին բոլոր տեղեկությունները, և ոչ միայն նրանք, որոնք տեսանյութում առկա են, հետաքննության ենթարկվեն օպերատիվ, անաչառ և արդյունավետ կերպով, իսկ մեղավորները ենթարկվեն պատասխանատավության», - ասված է ՄԱԿ-ի Մարդու իրավունքների հարցերով գերագույն հանձնակատարի խոսնակ Ռուփերթ Կոլվիլի Ժնևում արված հայտարարության մեջ: Նա հավելել է, որ այդ հանցագործությունների զոհերը պետք է հնարավորություն ունենան ստանալու անհրաժեշտ բժշկական և հոգեբանական օգնություն, ինչպես նաև նյութական փոխհատուցում:

Նա հիշեցրել է, որ միջազգային իրավունքը բացարձակապես արգելում է տանջանքների կիրառումը և նշել է, որ Վրաստանը վավերացրել է Տանջանքերի դեմ կոնվենցիան և դրա կամընտրական արձանագրությունը, ինչը միջազգային մասնագետներին թույլատրում է առանց զգուշացնելու ստուգումներ անցկացնել բանտերում:

Բարձրագույն հանձնակատարի վարչությունը հայտարարել է նաև, որ պատրաստ է Վրաստանի կառավարությանը և ժողովրդին օգնություն ցուցաբերել՝ բանտերում և քննչական մեկուսարաններում ղեկավարումը լավացնելու գործում: