Եթովպիայի նոր վարչապետը երդում է տվել

Al Jazeera-ի տեղեկացմամբ` տեղի է ունեցել Եթովպիայի նոր վարչապետ Հայլեմրիամ Դեսալեգնի երդմնակալության արարողությունը, ով խոստացել է հաստատել երկարաժամկետ ղեկավար Մելես Զենավիի ժառանգությունը: Վերջինս մահացել է անցյալ ամիս:

«Ես` Հայլեմրիամ Դեսալեգնս, խորհրադարանի առջև համաձայնում եմ լինել Եթովպիայի վարչապետ»,-ասաց նա, երբ խորհրդարանականները որպես աջակցություն հարվածում էին իրենց սեղաններին:

47-ամյա Հայլեմրիամը ընտրվել է անցյալ շաբաթ՝ որպես իշխող «Եթովպիայի ժողովուրդների հեղափոխական ժողովրդավարական ճակատ» (EPRDF) կուսակցության նախագահ, որն ունի ճնշող մեծամասնություն խորհրդարանում: Մելեսի մոտիկ դաշնակից լինելով՝ որպես վարչապետի տեղակալ և արտգործնախարար, 2010թ. ի վեր Հայլեմրիամը խոստացել է շարունակել Մելեսի քայլերը, ով ղեկավարել է երկիրը ավելի քան երկու տասնամյակ:

Որոշ վերլուծաբանների կարծիքով՝ Հայլեմրիամը դժվար կացության մեջ կհայտնվի իր՝ համեմատաբար երիտասարդ տարիքի, ազգային քաղաքականության մեջ սահմանափակ փորձի պատճառով, ինչպես նաև այն փաստի համար, որ նա դեռևս ուժեղ համարվող նախկին ապստամբների կորիզը չէ, ովքեր տիրեցին երկրին 1991 թվականին: