«168 Ժամ». ՀՀ նախագահի հրավերը

Երեկ ՀՀ նախագահ Սերժ Սարգսյանի կողմից Մարզահամերգային համալիրում կազմակերպված Անկախության 21-ամյակին նվիրված միջոցառմանը թեև ժողովրդական կուսակցության նախագահ Տիգրան Կարապետյանը հրավիրված է եղել, սակայն չի մասնակցել:

«Ինձ ուղարկել են հրավեր, բայց չեմ գնալու: Իհարկե, տոն է, հաճելի է, ես արդեն հասցրել եմ լինել Եռաբլուրում: Բայց տոնել մարդկանց հետ, ովքեր քննադատում են... համարում եմ կեղծավորություն: Այս պատճառով չեմ գնալու»,- «168 ժամ»-ի թղթակցի հետ զրույցում ասել է նա:

Քաղաքական մյուս ուժերից ՀՀ նախագահի հրավերը չեն ընդունել նաև ՀԱԿ-ն ու «Նոր ժամանակներ» կուսակցության նախագահ Արամ Կարապետյանը: Վերջինս թերթի թղթակցի հետ զրույցում ասել է, թե ինքը նախընտրում է մնալ տանն ու օրն անցկացնել ընտանեկան միջավայրում. «Ես երբևէ չեմ գնացել, չնայած, անկեղծ ասած, Ռոբերտ Քոչարյանի նախագահության օրոք ինձ չէին էլ հրավիրում: Ըստ իս' Հայաստանում այնպիսի վիճակ է, որը թույլ չի տալիս, որ նմանատիպ տոնակատարությանը մասնակցեն բոլորը: Իհարկե, շնորհակալ եմ հրավերի համար, բայց մնում եմ իմ կարծիքին, որ Հայաստանում դեռ լուրջ փոփոխություններ չեն եղել, որ կարողանանք բոլորս միասին տոնել»,- ասել է նա:

Իսկ ՀԱԿ անդամ Արամ Մանուկյանը «168 ժամ»-ի թղթակցին ասել է, որ իրենք Անկախությունը նշելու են Սարյանի արձանի մոտ:

ԱԻՄ կուսակցության առաջնորդ Պարույր Հայրիկյանը, ով թերթի թղթակցի հետ զրույցի ժամանակ սլանում էր Մարզահամերգային համալիր, ասել է. «Ես մեծամիտ մարդ չեմ, գիտեմ, որ իմ ներդրումը մոռացել են, բայց ես հո աբիժնիկ չե՞մ, որ չգնամ: Ինձ բազմաթիվ մարդիկ շնորհավորում են: Ուրախանում եմ, որ կան մարդիկ, ովքեր իմ կատարած ներդրումով ուրախանում են»:

Այս միջոցառմանը մասնակցել է նաև «Ժառանգություն» կուսակցությունը: Ստյոպա Սաֆարյանը թերթի թղթակցի հետ զրույցում ասել է, որ իրենք ամեն տարի ընդունել են ՀՀ նախագահի հրավերը, և այս տարի նույնպես չեն պատրաստվում խախտել այդ ավանդույթը: