«Հրապարակ». Աժիոտաժ ԱԺ–ում

Նախորդ օրն ԱԺ-ում մեծ աժիոտաժ էր. կարգի էին բերվում սենյակները, մաքրվում «գարաժի» սարդոստայնները, Հերոյանի գնած փոշեծծիչով վերցվում էին ծառերի փոշիները: Աշխատակազմի նորանշանակ ղեկավար Գուրգեն Դումանյանն առաջին շրջայցն էր կատարում, անցնելով սենյակ առ սենյակ, հատ-հատ հարցնում էր՝ ի՞նչ խնդիրներ կան, ի՞նչ բողոքներ ունեն աշխատակիցներն ու պատգամավորները: «Հրապարակ»-ը գրում է, որ բողոքներ կային ֆրակցիաների ու պատգամավորների կողմից' սենյակների անարդար բաշխման, փորձագետներին և օգնականներին «միջանցքի սիրուն աղջիկ» դարձնելու, աշխատանքային նորմալ պայմաններ չապահովելու, «մեկին հազար ձի ու ջորի, մեկին առանց մաքի» թողնելու մասով:

Երիտասարդ Դումանյանին հլու-հնազանդ ուղեկցում էր ԱԺ գործերի կառավարիչ ընկեր Համիկը' բացատրություններ տալով, թե ուր են «մաքիներն ու ջորիները»: Այդ օրն ԱԺ-ում չէր Հովիկ Աբրահամյանը, նա գործուղման էր Ստրասբուրգում, և Համիկի «բացատրություններից» ԱԺ-ում շատ արագ հասկացել էին, որ նոր աշխատակազմի ղեկավարը, որը ՀՀԿ ջահելների կաստայից է և նրանց «հովանավորությամբ» է ստանձնել պաշտոնը, ինքնուրույն խաղացող է, ու իրենց դեռ հետաքրքիր օրեր են սպասվում: