ՔՊ-ական պաշտոնյաների ԽԾԲ-ն. Անդրեյ Ղուկասյան

Շարունակելով ներկայացնել ՔՊ-ական պաշտոնյաների և հատկապես՝ նախկին և ներկա մարզպետների ԽԾԲ-ն, այսօր կանդրադառնանք Լոռու նախկին մարզպետ Անդրեյ Ղուկասյանին:

Նախորդ տարի թեժացել էին կրքերը Վանաձորի թիվ 20 հիմնական դպրոցում, որտեղ աշակերտներն էին դասադուլ անում: Նրանք և կոլեկտիվը դժգոհ էին, որ դպրոցի տնօրեն է ընտրվել մարզպետի հովանավորյալ Կարինե Մարգարյանը:

Ղուկասյանի մյուս «մտերիմը»՝ նախկին լրագրող, այնուհետև մարզպետի խորհրդականի պաշտոնը ստացած Գայանե Սարգսյանն է:

Մարզի ընտանիքի, կանանց եւ երեխաների իրավունքների պաշտպանության բաժնի պետ էր նշանակվել Սարգիս Գրիգորյանը, որը եղել է Ստեփանավանի ոստիկանության քրեական հետախուզության բաժանմունքի նախկին պետը եւ դատվել է 2018 թվին։ ՔՊ-ի ֆունդամենտալ անդամ Ղուկասյանը հերթական անգամ իր մտերիմին էր նշանակել կարեւոր պաշտոնի` ոչ միայն հաշվի չառնելով, որ նա «նախկին» է, այլեւ՝ որ դատված է, եւ, ոչ ավել-ոչ պակաս` կանանց-երեխաների, ընտանիքի հարցերով մարզային պատասխանատուն է:

2019 թվականի մայիսի 21-ին անցկացվել է Վանաձորի ԲԿ-ի տնօրենի պաշտոնի համար հայտարարված մրցույթը: Մրցույթին մասնակցելու համար դիմել էին 3 թեկնածուներ՝ Անուշավան Նիկողոսյանը, Աշոտ Ամիրյանը և Վահագն Մկրտչյանը: Թեև մրցույթին մասնակցելու համար համապատասխան փաստաթղթեր էին ներկայացրել բոլորը, սակայն Լոռու մարզպետարանում անցկացված մրցույթին Անուշավան Նիկողոսյանն ու Աշոտ Ամիրյանը չեն ներկայացել:  Politik.am-ի տեղեկությունների համաձայն՝ Վանաձորի բժշկական կենտրոնի տնօրենի պաշտոնի համար հայտարարված մրցույթի երեք մասնակիցներն էլ Լոռու այն ժամանակվա մարզպետ Անդրեյ Ղուկասյանի ընկերներն են։ Անուշավան Նիկողոսյանի և Աշոտ Ամիրյանի՝ մրցույթին ներկայացված մասնակցության հայտերը, ըստ էության, եղել են ձևական: