ՔՊ-ական պաշտոնյաների «մենամարտերը». Անդրեյ Ղուկասյան, Արամ Խաչատրյան

Շարունակելով ընթերցողի ուշադրությանը ներկայացնել՝ պատերազմող ՔՊ-ականների միջև փոխհարաբերությունները, մեկը մյուսի ոտքի տակ փորելու դրվագները, այսօր կանդրադառնանք՝ Լոռու նախկին մարզպետ Անդրեյ Ղուկասյանի և նախկին փոխմարզպետ, այնուհետև պատգամավոր, իսկ այսօր արդեն մարզպետ՝ Արամ Խաչատրյանի փոխհարաբերություններին:

Ի սկզբանե մամուլը գրում էր, որ մարզի համար այս երկու ՔՊ-ականների միջև անզիջում պայքար է ընթացել: Լոռու մարզում բոլորը գիտեն, որ Արամ Խաչատրյանի և Անդրեյ Ղուկասյանի ջրերը մի առվով չեն հոսում: Ղուկասյանն էլ ամեն բան անում էր, որպեսզի Խաչատրյանի բերած հեղափոխական կադրերից ազատվի ու իր մարդկանց նշանակի: Նա նույնիսկ Խաչատրյանի ընդունած վարորդին՝ Հայկ Հակոբյանին էր ազատել աշխատանքից՝ առանց որոշակի պատճառաբանության: Այնուհետև վարչապետի թիվ 305-Ա որոշմամբ Լոռու մարզպետի տեղակալ Արշակ Հովսեփյանն ազատվել էր զբաղեցրած պաշտոնից: Նա նշանակավել էր 2018 թ. հոկտեմբերի 16-ին: Հովսեփյանին ևս այս պաշտոնում երաշխավորել էր Խաչատրյանը:

Այն ժամանակ դեռևս  պատգամավոր Արամ Խաչատրյանը պատգամավորական մի քանի գրություններով դիմել էր Լոռու մարզպետ Անդրեյ Ղուկասյանին: Բանն այն է, որ ըստ մամուլի, Խաչատրյանը կասկածի տակ էր առել մարզպետի կողմից պետական միջոցների նպատակային օգտագործումը, մասնավորապես՝ վառելիքի ծախսը, դպրոցական խորհուրդների անդամների նոր կազմը, Վանաձորի քաղաքապետարանի կողմից «Քաղաքացու Օր» միջոցառման ծախսերի վերահսկողությունը:

Մամուլի տեղեկություններով՝ Անդրեյ Ղուկասյանը փոխմարզպետ Արշակ Հովսեփյանին հրահանգել էր աշխատանքից ազատման դիմում ներկայացնել, ինչին վերջինս չի համաձայնել։ Ավելին՝ Ղուկասյանը նրան ասել էր, որ հրահանգ է եղել «վերեւներից», մասնավորապես՝ ՀՀ տարածքային կառավարման եւ զարգացման նախարար Սուրեն Պապիկյանից։ Ղուկասյանը, ըստ մամուլի հրապարակումների, համարվում էր Արամ Խաչատրյանի կադրը, սակայն, վերջինս դա հերքել է: