Որն է Եվրոպայում ջրհեղեղներ առաջացրած անձրևների հավանական պատճառը․ World Weather Attribution (լուսանկարներ)

Հուլիսի կեսերին Արևմտյան Եվրոպայում ջրհեղեղների պատճառ դարձած հորդառատ անձրևները, ըստ երևույթին, առաջացել են կլիմայի գլոբալ փոփոխության պատճառով, ասում են World Weather Attribution հետազոտական ​​խմբի գիտնականները:

Գերմանիայի, Բելգիայի, Նիդեռլանդների, Շվեյցարիայի, Ֆրանսիայի, ԱՄՆ-ի և Միացյալ Թագավորության գիտնականները հետազոտություն են անցկացրել՝ պարզելու, թե որքանով է մարդու գործոնով պայմանավորված կլիմայի փոփոխությունը ազդում անձրևների հավանականության և ինտենսիվության վրա, որոնք առաջացնում են մեծ ջրհեղեղներ:

Գիտնականները վերլուծել են, թե ինչպես է կլիմայի փոփոխությունը ազդում ամառային սեզոնի առավելագույն օրական տեղումների վրա Գերմանիայի և Բելգիայի երկու փոքր շրջաններում, որոնք առավելապես տուժել են վերջին ջրհեղեղներից:

«Բոլոր առկա տվյալները, ներառյալ ֆիզիկական գործոնները, մեծ տարածաշրջանի դիտարկումները և կլիմայի տարբեր տարածաշրջանային մոդելները, մեզ վստահություն են տալիս, որ կլիմայի անտրոպոգեն փոփոխությունը մեծացրել է նման երևույթի հավանականությունը և ինտենսիվությունը, և այդ փոփոխությունները կշարունակվեն գլոբալ տաքացման արագացված պայմաններում», - ասվում է WWA խմբի հաղորդագրության մեջ:

Հուլիսի 12 -15 -ը Արևմտյան Եվրոպայում հորդառատ անձրևները ավերիչ ջրհեղեղների պատճառ դարձան, մասնավորապես՝ Գերմանիայի արևմուտքում, ինչպես նաև Լյուքսեմբուրգում և Բելգիայի ու Նիդեռլանդների որոշ հատվածներում: Արդյունքում՝ Գերմանիայում մահացել է ավելի քան 180, Բելգիայում՝ 38 մարդ: Ջրհեղեղը զգալի վնաս է հասցրել ենթակառուցվածքներին`ավերելով շենքեր, կամուրջներ, ճանապարհներ: