ՔՊ-ն փնտրտուքների մեջ է. ո՞վ կլինի Գյումրիի քաղաքապետի իշխանական թեկնածուն

Աշունը բավական հետաքրքիր է լինելու ՏԻՄ ընտրությունների առումով: Հատկապես  ուշագրավ է Գյումրիում սպասվող քաղաքապետի ընտրությունները, որոնց ՔՊ-ն, կարծես թե, պատրաստ չէ, համենայնդեպս, դեռևս հստակություն չկա այն հարցում, թե ով կարող է լինել ՔՊ քաղաքապետի թեկնածուն՝ մշակութային մայրաքաղաքում:

Մամուլում գրվել է այն մասին, որ ՔՊ-ն, չունենալով բավական ուժեղ թեկնածու իր թիմից, կարող է դիմել գործող քաղաքապետ Սամվել Բալասանյանի օգնությանը: Տեղեկություններ կան, որ Գյումրիում քաղաքապետի թեկնածուի հարցում ՔՊ-ն արդեն բանակցում է գործող քաղաքապետ, ճակատին մի քանի կուսակցության անուն դաջած Սամվել Բալասանյանի հետ, որ նա դառնա իրենց թեկնածուն:

Ըստ մամուլի` քննարկվել է նաև Երևանի նախկին փոխքաղաքապետ, Գյումրու դրամատիկական թատրոնի նախկին տնօրեն Տիգրան Վիրաբյանի թեկնածությունը: Տիգրան Վիրաբյանի մասին՝ որպես Գյումրիի քաղաքապետի՝ իշխանությունների նախընտրած թեկնածուի, խոսում էին դեռևս մեկ տարի առաջ, երբ խոսք էր գնում այն մասին, որ գործող քաղաքապետ Սամվել Բալասանյանը վայր է դնելու իր լիազորությունները:

Պակաս հավանական թեկնածուներ չեն՝ պատգամավորներ Կարեն Սարուխանյանը, ով նախկինում զբաղեցրել  է Շիրակի մարզպետի պաշտոնը և ծնունդով գյումրեցի պատգամավոր Կարեն Մխչյանը, ինչպես նաև Շիրակի գործող մարզպետ Հովհաննես Հարությունյանը:

Թե ում շանսերն են ավելի մեծ՝ դժվար է ասել, թերևս՝ գործող քաղաքապետինը, քանի որ վերջինս ունի որոշակի հեղինակություն և էլեկտորատ քաղաքում: Բալասանյան-Փաշինյան հարաբերություններն էլ հեղափոխությունից հետո բավական հարթ և սահուն են ընթացել, Գյումրիի քաղաքապետին կարծես թե չեն շտապում ներառել նախկին թալանչիների շարքը:

Տիգրան Վիրաբյանը իր հերթին ոչնչով աչքի չի ընկել՝ Երևանի փոխքաղաքապետ աշխատելու ընթացքում, միայն նրանով, որ Ամանօրի տոնակատարությունների կազմակերպման համար շուրջ 54 միլիոն դրամ ստացած Factory ընկերության տնօրենը Վիրաբյանի ընկերն էր:

Կարեն Սարուխանյանը, լինելով Շիրակի մարզպետ, հասցրել է հայտնվել բազմաթիվ պիկանտ պատմությունների կիզակետում: Մամուլը բազմիցս անդրադարձել էր մարզում իրականացվող կադրային ջարդին: Գրվում էր նաև այն մասին, որ Կարեն Սարուխանյանը՝ կոռուպցիոն գործով անցնող կադաստրի նախկին պետի «կնքահայրն» էր:

Ինչո՞վ է աչքի ընկել Շիրակի գործող մարզպետը: Դիցուք՝ օրեր առաջ մամուլը գրել էր, որ մարզպետը ապօրինի ազատել էր դպրոցի տնօրենի մրցույթը հաղթած դաշնակցականին: Շիրակի մարզպետի ԺՊ-ի հունիսի 4-ի որոշմամբ՝ աջակցության նպատակով 49 քաղաքացու տրամադրվել է մեկ միլիոն հինգ հարյուր քառասուն հազար դրամ միանվագ օգնություն: Ինչ՞ է սա, եթե ոչ լեգալ ընտրակաշառք, որի ընտրակաշռք լինելու հանգամանքը, իհարկե, չես կարող ապացուցել, անգամ՝ ամեն բան հասկանալով և գիտակցելով: 

Կարապետ Մխչյանը ԱԺ-ում հարաբերականորեն վերջերս է հայտնվել: Մինչ այդ նա Գյումրու քաղաքապետի խորհրդականն էր: