ՔՊ-ական նախարարների անցած ուղին. Վահրամ Դումանյան

Շարունակելով ընթերցողի ուշադրությանը ներկայացնել՝Նիկոլ Փաշինյանի կաբինետի անդամների անցած ուղին` այսօր կանդրադառնանք ԿԳՄՍ նախարար Վահրամ Դումանյանին:

Իր գործընկերներից Դումանյանը դրականորեն առանձնանում է պրոֆեսորի գիտական աստիճանով`  ֆ.մ.գ.դ. «Երկրորդ կարգի ընդհանուր էլիպսական հավասարումների համար Դիրիխլեի խնդրի մասին», 2012, ԵՊՀ, ք. Երևան: ֆ.մ.գ.թ.  «Հիպերբոլական հավասարումների լուծումների հավասարաչափ քվազիասիմպտոտիկայի մասին», 1990, ԽՍՀՄ ԳԱ Վ.Ա.Ստեկլովի անվան Մաթեմատիկական ինստիտուտ, ք. Մոսկվա:

Վերջինիս կենսագրությունից տեղեկանում ենք, որ նախարարի աշխատանքային փորձը հետևյալն է՝  ԵՊՀ Ինֆորմատիկայի և կիրառական մաթեմատիկայի ֆակուլտետ (դեկան), ԽՍՀՄ ԳԱ Վ.Ա.Ստեկլովի անվան Մաթեմատիկական ինստիտուտ, ք.Մոսկվա, Ս.Բանախի անվան միջազգային մաթեմատիկական կենտրոն, Վարշավա, Լեհաստան, Թրիերի համալսարան, Գերմանիա; Պադերբորնի համալսարան, Գերմանիա:

Վահրամ Դումանյանը նաև մի շարք գիտական հոդվածների և թեզիսների հեղինակ է: Նա ավելի վաղ դիմել էր ԵՊՀ ռեկտորի թափուր պաշտոնի համար, սակայն մրցույթի արդյունքում չընտրվեց: Կրթության ոլորտի վերաբերյալ նրա դիրքորոշումներից առավել հայտնի է այն, որ Դումանյանի համոզմամբ` մասնավորն ու բուհական համակարգը պետք է սերտ համագործակցեն։ Դումանյանի նախարար նշանակվելուց հետո ստորագրվել է գործընկերային համաձայնագիր ՀՀ հանրակրթական հաստատություններում ֆրանսերենի դասավանդման զարգացման վերաբերյալ: Նախարարը նաև պարբերաբար հանդիպում է պրոֆեսորադասախոսական կազմի ներկայացուցիչների, մարզիկների և մշակութային գործիչների հետ՝ ծանոթանալու վերջիններիս խնդիրներին և լսելու նրանց առաջարկները: Նման հանդիպումները նախարարությունում վերջին շրջանում պարբերական բնույթ են կրում: