Դիրիժոր Կարեն Դուրգարյանը նշանակվել է Ա.Սպենդիարյանի անվան օպերայի և բալետի ազգային ակադեմիական թատրոնի տնօրենի ժ⁄ պ

ԿԱՐԵՆ ԴՈՒՐԳԱՐՅԱՆ, դիրիժոր

Ծնվել է Երևանում: 1996 թվականին ավարտել է Երևանի Կոմիտասի անվան պետական կոնսերվատորիան: 1997-ին կատարելագործվել է Սանկտ Պետերբուրգի կոնսերվատորիայում՝ պրոֆ. Ի.Մուսինի դիրիժորության դասարանում:

1995 թվականին Կ.Դուրգարյանը նշանակվել է Հայաստանի պետական ֆիլհարմոնիկ նվագախմբի դիրիժոր:

Կարեն Դուրգարյանը 15 տարի շարունակ եղել է Երևանի Ա.Սպենդիարյանի անվան օպերայի և բալետի ազգային ակադեմիական թատրոնի գլխավոր դիրիժորը:

Որպես հրավիրյալ դիրիժոր Կ.Դուրգարյանը մշտապես ղեկավարում է ՌԴ առաջատար օպերային թատրոնների ներկայացումները: 2008-ից նա Սանկտ Պետերբուրգի Միխայիլովյան օպերային թատրոնի, իսկ 2015-ից՝ Նովոսիբիրսկի օպերային թատրոնի մշտական հրավիրյալ դիրիժորն է՝ զուգահեռաբար հյուրախաղերով ներկայացել է աշխարհի տարբեր հեղինակավոր թատրոններում:

Կ.Դուրգարյանը Սանկտ Պետերբուրգի Մարիինյան թատրոնում ղեկավարել էԱ. Խաչատրյանի «Սպարտակ» բալետային ներկայացման նոր բեմադրությունը: Մաեստրո Վալերի Գերգիևի 60-ամյա հոբելյանի և «Մարիինյան 2» համերգասրահի բացման առիթով դիրիժորը 2013-ին հրավիրվել է մասնակցելու «Սպիտակ գիշերների աստղեր» փառատոնին:

Կ.Դուրգարյանը բալետային ներկայացումներ է ղեկավարել Լայպցիգի օպերային թատրոնում և Լիոնի Opéra National-ում:

2016-ին Ա. Խաչատրյանի «Սպարտակ» բալետային ներկայացման նոր բեմադրությամբ Bayerische Staatsoper-ում տեղի է ունեցել մաեստրո Դուրգարյանի բեմելը: Նույն բալետը 2017-ի հունվարին նա ղեկավարել է Վալոնիայի Royal Ballet թատրոնում (Բելգիա):

Որպես սիմֆոնիկ համերգների դիրիժոր Կ.Դուրգարյանը լայն գործունեություն է ծավալել հատկապես Իտալիայի Teatro Lirico, Cagliari, Teatro Regio Torino, Teatro Carlo Felice, Genova, Teatro Verdi, Sassari թատրոններում, ինչպես նաև ղեկավարել է համերգներ Orchestra di Padova e del Veneto, Luigi Cherubini Orchestra նվագախմբերի հետ: Ravenna Festival-ի շրջանակներում դիրիժորը համագործակցել է Toradze Piano Studio-ի հետ:

Կարեն Դուրգարյանը հանդես է եկել Պալերմոյի Sinfonica Siciliana և Միլանի I Pomeriggi Musicali նվագախմբերի հետ:

2016 թվականին պրոկոֆևյան երաժշտության ծրագրով կայացել է Կ. Դուրգարյանի բեմելը Israel Philharmonic Orchestra-ի հետ, իսկ 2017-ին նա առաջին անգամ ղեկավարել է Brussels Philharmonic Orchestra-ն: 2019-ին դիրիժորը նույն նվագախմբի հետ կրկին ելույթ է ունեցել Klara Festival-ի շրջանակում:

2018 թվականին բալետային երկու գալա ծրագրերում Կ.Դուրգարյանը հայկական բալետի արտիստների մասնակցությամբ առաջին անգամ ղեկավարել է Malaysian Philharmonic Orchestra-ն: 2018 և 2019 թվականներին դիրիժորը ղեկավարել է Նեապոլի Teatro di San Carlo թատրոնում բեմադրված Պ. Չայկովսկու «Շչելկունչիկ» բալետային ներկայացումը:

Կարեն Դուրգարյանը ՀՀ վաստակավոր արտիստ է:

Արժանացել է «Մովսես Խորենացի» մեդալին: