ՔՊ-ից ովքե՞ր են փորձելու ռևանշի հասնել Կապանում

Սյունիքի մարզի Կապան քաղաքում աշնանը նույնպես արտահերթ ՏԻՄ ընտրություններ են սպասվում և այստեղ հաղթանակ տանելը իշխանությունների համար կարելի է ասել պատվի հարց է, այն պարզ պատճառով, որ մեկ անգամ այստեղ ՔՊ-ն արդեն ջախջախվել է, երբ ՔՊ-ական Նարեկ Բաբայանին քաղաքապետի ընտրություններում հաղթեց գործող քաղաքապետ Փարսյանը:

Այսօր իշխանությունները կրկին հույս ունեն իրենցով անել Սյունիքի քաղաքները՝ այդ թվում, իհարկե, Կապանը և հասնել Գևորգ Փարսյանի հեռանալուն: Մամուլը գրել էր, որ որպես քաղաքապետի թեկնածու ՔՊ-ում դիտարկում են պատգամավոր Դավիթ Դանիելյանը: Վերջինս չէր հերքել և չէր հաստատել այդ շշուկները` նշելով, որ կան նման խոսակցություններ: Դավիթ Դանիելյանը՝ Արայիկ Հարությունյանի նկարիչ սանիկն է, ով նախկինում Պետական վերահսկողական ծառայության պետի օգնականն էր, նա համակարգում էր մամուլի հետ աշխատանքները։ Այնուհետև վերջինս կարիերային լուրջ թռիչք արձանագրեց, դառնալով ԱԺ պատգամավոր:

Հավանական թեկնածուների շարքում է նաև մեկ անգամ Կապանում պարտություն կրած՝ Սյունիքի ներկայիս փոխմարզպետ Նարեկ Բաբայանը: Դեռևս այն ընտրությունների ժամանակ մամուլը գրում էր, որ Կապանում ընտրողներին ուղղորդում են՝ ընտրելու Բաբայանին: Այնուհետև շատ էր խոսվում այն մասին, որ Բաբայանին կնշանակեն Սյունիքի մարզպետ, սակայն, վերջինիս բախտը այստեղ էլ չբերեց: Հունիսի 20-ին կայացած ԱԺ արտահերթ խորհրդարանական ընտրություններից հետո, Սյունիքի մարզում համառ լուրեր սկսեցին շրջանառվել, որ ՔՊ-ն Սյունիքում մարզպետի փոփոխություն է անելու:Մամուլը գրում էր, որ մարզպետ դառնալու համար Բաբայանը գործի էր դրել իր ծանր հրետանին, բայց՝ ապարդյուն:

Հաջորդ հավանական թեկնածուն ԱԺ պատգամավոր. ծնունդով Կապանցի Նարեկ Ղահրամանյանն է: Վերջինս այնքան էլ աչքի չի ընկել որպես պատգամավոր, իսկ հիշում են նրան հիմնականում վերջին օրերին տված այն հավաստիացման շնորհիվ, համաձայն որի մեկ օրվա ընթացքում ադրբեջանցիները պետք է բացեին Գորիս-Կապան մայրուղին,հիշեցնենք՝ Ղահրամանյանի կիսախոստումը հպարտ քաղաքացիներին այդպես էլ չէր կատարվել: Ղահրամանյանը նաև այն պատգամավորն է, ով հայտարարել էր, որ ալընտրանքային ճանապարհները պետք է օր առաջ կառուցվեն, ասել է թե՝ Սյունիքում ստեղծված իրավիճակը պատգամավորին ամբողջությամբ ձեռ է տալիս...