«էյփլամաններն» հուսալքված են` անհայտ անձինք սրբել տարել են 252 iPhone 5

 «Apple» - ի հերթական iPhone 5-ի շուրջ կրքերը դեռ չեն հանդարտվել: Նոր սարքը ձեռք բերելու ցանկությունն այնքան մեծ է եղել, որ ոմանք խանութների մերձակայքում վրաններ են ամրացրել և ավելի քան մեկ շաբաթ գիշերել են այնտեղ' սրտատրոփ սպասելով «էյփլյան» գլուխգործոց iPhone 5-ի «ժամանմանը»:

Սակայն, այն ինչ տեղի ունեցավ նախօրեին միաժամանակ զավեշտալի է ու ապշեցուցիչ: Բան այն է, որ հարավ-արևմտյան Լոնդոնում' Ուիմբելդոնի խանութներից մեկի մերձակայքում հերթապահող, մեկ շաբաթ վրանային կյանքով ու իրենց սիրելի «խաղալիքին» սպասող «էյփլամանները» ստիպված եղան հեռանալ խանութից' դատարկաձեռն:

Խանութում վաճառվող բոլոր 252 սմարթֆոններն անհայտ անձինք բառից բուն իմաստով սրբել տարել են: Եվ այսպես, ինչպես այսօր հաղորդել են իրավապահ մարմինները' նախաքննության արդյունքները վկայում են, որ գողությունը տեղի է ունեցել ուրբաթ' սմարթֆոնի պաշտոնական վաճառքի մեկնարկից հաշված ժամեր առաջ:

Հավելեմ նաև, որ ըստ տեղեկությունների' գողոնի ընդհանուր արժեքը գերազանցել է 170 հազար ֆունտը, որն համարժեք է 275 հազար դոլարի:

Միքայել Մարգարյան

Սկզբնաղբյուրը' ИТАР-ТАСС