Վահան Քերոբյանի միֆերի «ապամոնտաժումը»

Վերլուծական 2 Սեպտեմբեր, 2021 20:35

Վերջին օրերը էկոնոմիկայի նախարարի համար բավական անհաջող էին, տպավորություն է, որ աստղերը երես են թեքել ամբիցիոզ Վահան Քերոբյանից, և վերջինիս նախանշած աննախադեպ և ռեկորդային ցուցանիշները մեկը մյուսի հետևից հերքվում են:

Դիցուք՝ էկոնոմիկայի նախարարը ավետել էր, որ Հայաստանին սպասվում է ոչ ավել , ոչ պակաս՝ տուրիզմի 319 տոկոսի աճ: Քչերը հետաքրքրվեցին, թե ինչու ոչ` 320 և ինչը պետք է գրավի տուրիստներին հետպատերազմյան երկրում, որի սուվերեն տարածքում թշնամական զորքեր են գտնվում: Սակայն, զբոսաշրջության կոմիտեն որոշել էր քար գցել Քերոբյանի ռեկորդների վրա: Պարզվում է, այս տարվա առաջին կիսամյակում նախորդ տարվա համեմատ զբոսաշրջիկների թիվը նվազել է 22,2 %–ով։ Նշված ժամանակահատվածում Հայաստան է այցելել 239 263 զբոսաշրջիկ։ Նախորդ տարի նույն ժամանակահատվածում այդ ցուցանիշը 307 590 էր։

Նույն Քերոբյանը ասում էր, որ գնաճը հանրապետությունում չնչին է և չի կարող որևէ կրիտիկական ազդեցություն ունենալ: Մինչդեռ Հայաստանի սպառողական շուկայում 2021թ. հուլիսին 2020թ. հուլիսի նկատմամբ 8.2% գնաճ է գրանցվել: Այս մասին են վկայում Վիճակագրական կոմիտեի (ՀՀ ՎԿ) հրապարակած տվյալները: 12-ամսյա գնաճի տեմպերը վերջին երկու ամիսներին նկատելիորեն արագացել են: Ըստ Կենտրոնական բանկի կանխատեսումների՝ մինչև 2021 թվականի տարեվերջ Հայաստանում բարձր գնաճը կպահպանվի, և միայն եկող տարվա սկզբից այն աստիճանաբար կթուլանա ու մի քանի ամիսների ընթացքում կհասնի թիրախային 4%-ին:

Մեկ այլ դրվագ: Հայաստանի էկոնոմիկայի նախարարությունը հաղորդագրություն է տարածել և «ավետել», որ Հայաստանում ընթացիկ տարվա երկրորդ եռամսյակում արձանագրվել է 13% տնտեսական աճ։ Ազգային վիճակագրական կոմիտեի տվյալները նշելիս նախարարոթյունը, սակայն, մոռացել է մի «չնչին» մանրուք շեշտել, թե որ ժամանակահատվածի համեմատությամբ է այդ տնտեսական աճը։ Իսկ սովորաբար համեմատությունն արվում է նախորդ տարվա համապատասխան ժամանակահատվածի հետ։ Եթե համեմատում ենք 2020թ երկրորդ եռամսյակի հետ, կարող ենք միանգամից արձանագրել էկոնոմիկայի նախարարության մանիպուլյացիան, քանի որ 2020թ երկրորդ եռամսյակում Հայաստանում տոտալ լոքդաուն էր հայտարարված, այսինքն` տնտեսությունը փաստացի զրոյի վրա էր:

Վահան Քերոբյանը խոսում էր նաև Հայաստան հորդացող ներդրումների մասին: Sակայն այստեղ էլ ամեն ինչ միանշանակ չէ: Առաջին կիասմյակում օտարերկրյա ներդրողների միջոցներով Հայաստանում ընդամենը մոտ 7 մլրդ դրամի շինարարություն է իրականացվել (սա ներառված է կազմակերպությունների կողմից իրականացվող շինարարության մեջ)։ Հատկանշական է, որ նախորդ տարվա առաջին կիսամյակի համեմատ այն կրճատվել է 31.8%-ով։ Սա ուղղակիորեն խոսում է այն մասին, որ օտարերկրյա ներդրումները Հայաստանում ոչ միայն չեն ակտիվանում, այլև՝ գնալով ավելի են պակասում։

Տարեվերջին Քերոբյանը երկնիշ տնտեսական աճ էր խոստանում, հակառակ դեպքում` սպառնում էր հրաժարական տալ: Մինչդեռ, ըստ Համաշխարհային բանկի նոր կանխատեսումների, 2021 թվականին Հայաստանի տնտեսական աճը կկազմի 3.4%:

Ինչպես տեսնում ենք՝ կամ ամբողջ աշխարհը ձայնը մեկ է արել ընդդեմ Վահան Քերոբյանի և քանդում է վերջինիս առաջ քաշած միֆերը, կամ նա ի սկզբանե մոլորեցրել էր հանրությանը և այդ հանգամանքը այսօր ջրի երես է դուրս գալիս...