Օբաման մեղադրում է Ռոմնիին պատերազմի կոչ անելու մեջ

ԱՄՆ-ի նախագահ Բարաք Օբաման կտրուկ պատասխան է տվել հանրապետականների թեկնածու, գալիք ընտրություններում իր քաղաքական հակառակորդ Միթ Ռոմնիին՝ պատասխանելով նրա՝ իր անվճռական քաղաքականության վերաբերյալ մեղադրանքներին: «Եթե նախկին նահանգապետ Ռոմնին մեզ առաջարկում է ևս մեկ պատերազմ սկսել, թող այդպես էլ ասի»,-հայտարարել է նախագահը:

Ռոմնին մեկ անգամ չէ, որ նշում է, թե ԱՄՆ-ի ներկայիս վարչակարգը անհրաժեշտ չափով կոշտ քաղաքականություն չի վարում Իրանի նկատմամբ և չի կատարում Իսրայելի հանդեպ իր դաշնակցային պարտականությունները: Ռոմնին հատկապես մեծ սխալ է համարել այն, որ Օբաման եկող շաբաթ չի պատրաստվում հանդիպել Իսրայելի վարչապետ Բենիամին Նաթանյահուի հետ Նյու Յորքում կայանալիք ՄԱԿ-ի Գլխավոր Ասամբլեայի նստաշրջանի ժամանակ: «Դա ազդակ է դեպի Մերձավոր Արևելք այն մասին, որ մենք այս կամ այն կերպով հեռավորություն ենք պահպանում մեր դաշնակիցներից»,- հայտարարել է հանրապետականների թեկնածուն:

Բարաք Օբաման այժմ չի պլանավորում որևէ հանդիպում ունենալ օտարեկրյա առաջնորդներից որևէ մեկի հետ Գլխավոր Ասամբլեայի նստաշրջանի ժամանակ, սակայն Սպիտակ տունը հայտարարել է, որ դա բացառապես կապված է նրա նախընտրական խիստ գրաֆիկի հետ: Ինքը՝ նախագահը հայտարարել է, որ բազմիցս հեռախոսային զրույցներ է ունեցել Իսրայելի վարչապետի հետ և կիսում է Իրանի միջուկային ծրագրի շուրջ նրա անհանգստությունը: «Դա սպառնալու է Իսրայելին, մեզ և ողջ աշխարհին»,-նշել է նա: Նա միաժամանակ նշել է, որ պետանվտանգության հարցերում որոշումներ կայացնելիս նա առաջնորդվելու է միայն իր երկրի շահերով. «Ես կցանկանայի դադարեցնել այդ թեմայի հետ կապված ցանկացած խարդախություն»։