ՔՊ-ական մարզպետների անցած ուղին. Համբարձում Մաթևոսյան

Ծանոթանալով նոր կառավարության մարզպետների կենսագրությանը՝ կարելի է հասկանալ, թե որտեղ է նրանց ձախողումների պատճառը. նրանցից շատերը չունեն համապատասխան աշխատանքային փորձ: Արմավիրի մարզպետ Համբարձում Մաթեւոսյանի ոչ հարուստ կենսագրությունը հիմնականում կապված է արտերկրի հետ։  Նրա կենսագրականում նշված աշխատանքները որեւէ առնչություն չունեն ոչ հայաստանյան համայնքների, ոչ էլ, առավել եւս, մարզերի հետ: Մաթեւոսյանը մինչ մարզպետ նշանակվելը ծանոթ չէր հայաստանյան ներքին կյանքին, նրա խնդիրներին, մարզերի առանձնահատկություններին:

Ահա վերջինիս աշխատանքային փորձը. 2011-2012 թթ. ԱՄՆ Կալիֆորնիա նահանգի Գրոսմոնտ քոլեջի միջազգային ուսանողական բաժնի համակարգող: 2013-2014 թթ. Ուկրաինայի Դոնեցկ քաղաքի Կերամռեսուրս ՍՊԸ Եվրոպական շուկայի պատասխանատու: 2013-2015 թթ. Ուկրաինայի Դոնեցկ քաղաքում Հայաստանի Հանրապետության պատվավոր հյուպատոսի խորհրդական: 2016-2018 թթ. Հայաստանի ամերիկյան համալսարանի հումանիտար և հասարակական գիտությունների ֆակուլտետի կառավարիչ, ընդհանուր կրթության գծով խորհրդական: 16.10.2018 թ. Հայաստանի Հանրապետության կառավարության որոշմամբ նշանակվել է Հայաստանի Հանրապետության Արմավիրի մարզպետ:

Վերջինիս պաշտոնավարման ընթացքում մամուլում հրապարակումներ եղան` կապված մարզում կատարվող գնումների հետ. բանն այն է, որ այդ գնումները կատարվում էին այդ թվում նախկին պաշտոնյաների ընկերություններից, իսկ դա նոր Հայաստանում, մեղմ ասած, տարակուսելի էր դիտվում: Մամուլում բազմաթիվ հրապարակումներ եղան նաև այն մասին, որ Արմավիրի մարզպետ Համբարձում Մաթևոսյանի և Արմավիրի քաղաքապետ Դավիթ Խուդաթյանի հարաբերությունները շարունակում են լարված մնալ, և նրանք ցուցադրում են իրար հանդեպ ունեցած ոչ գործընկերային հարաբերությունները: Արմավիրի մարզպետը և քաղաքապետը անգամ առանձին-առանձին են ծաղկեպսակ դրել Արմավիրի քաղաքային զբոսայգում տեղադրված Ցեղասպանության զոհերի հիշատակի խաչքարի մոտ: