ՔՊ-ական մարզպետների անցած ուղին. Մելիքսեթ Պողոսյան

Ներկայացնելով մարզպետների անցած  ուղին և ձեռքբերումները՝ այսօր կանդրադառնանք Սյունիքի մարզպետ Մելիքսեթ Պողոսյանին:

Վերջինիս կենսգագրությունից պարզ է դառնում, որ Պողոսյանը աշխատանքային գործունեությունն սկսել է Կոռնիձորի կոլտնտեսությունից, ապա աշխատել տարբեր ընկերություններում։ 1989-1992թթ.-ին ընդգրկվել է Կոռնիձորի, իսկ 1992-1994թթ՝ տեղի կամավորական ջոկատներում եւ մասնակցել Գորիսի սահմանամերձ գյուղերի ինքնապաշտպանության համար մղված մարտական գործողություններին: Մասնակցել է 2016 թվականի ապրիլյան քառօրյա եւ 2020 թվականի մարտական գործողություններին: Ամուսնացած է, ունի 3 զավակ։ Պարգեւատրվել է «Գարեգին Նժդեհ», «Մայրական երախտագիտություն» ու եւս  8 այլ մեդալներով, պատվոգրերով: 2017 թվականից Երկրապահ կամավորականների միության Սյունիքի բաժանամունքի փոխնախագահն է: Նկատենք, որ Սյունիքի նորանշանակ մարզպետ Մելիքսեթ Պողոսյանը ԵԿՄ Սյունիքի բաժանամունքի նախագահն է եւ մարզպետ է նշանակվել 2020թ․-ի դեկտեմբերի 8-ի կառավարության որոշմամբ։ Մինչ այդ՝ գնդապետ Պողոսյանը Սյունիքի մարզպետի տեղակալն էր, զբաղվում էր մարզի ինքնապաշտպանական խնդիրներով։

Մարզպետ նշանակվելուց հետո Պողոսյանը հասցրել է հայտնվել սկանդալի կիզակետում: Սյունիքում շաբաթներ առաջ տեղի ունեցած զինված ռազբորկայի գլխավոր դերակատարը Սյունիքի մարզպետ Մելիքսեթ Պողոսյանի որդին է, որն ինքնաձիգից անկանոն կրակոցներ է արձակել՝ վիրավորելով 2 հոգու։ Ըստ սյունեցիների` նա նույնպես վիրավոր է, սակայն բուժօգնության համար չի դիմել, թաքնված է։ Իր հերթին` իրավապահները ձգտում են նրան ջրից չոր դուրս բերել, թեև տուժողներից մեկը կոմայի մեջ է, և վիճակը շատ ծանր է։ Պողոսյանը այս դեպքից հետո հայտարարեց, որ հրաժարական ներկայացնել չի պատրաստվում: