Նախկին և ներկա պաշտոնյաների ընտանիքները շարունակում են բյուջեից միլիոններ ստանալ

2020թ. ընթացքում Գեղարքունիքի մարզի 50 համայնքում և բնակավայրերում իրականացվել է 100-ից ավելի ծրագիր:  Նիկոլ Փաշինյանը մարտի 9-ին Գեղարքունիքի մարզ կատարած այցի ժամանակ հայտարարեց, որ Գեղարքունիքը նաև սուբվենցիոն ծրագրերի մասով ամենաակտիվ մարզերից է: Մարտունիում 2020թ. իրականացվել է 3 ծրագիր: 4 մանկապարտեզի և մարզադպրոցի շենքերի տանիքներին արևային ջրատաքացուցիչներ և համայնքապետարանի շենքի տանիքին ֆոտովոլտային կայանի տեղադրումը 29 մլն 510 հազար դրամով իրականացրել է «Արմեն-Մար» ՍՊԸ-ն: Ընկերության բաժնեմասերի 100 տոկոսը պատկանում է Մարտունիի համայնքապետ Արմեն Ավետիսյանի կնոջը՝ Մարինա Հովեյանին: Մարտու համայնքապետը, ի դեպ, համաձայն իր հայտարարագրի՝ 2020 թվականին ճոխ նվիրատվություններ է ստացել, մասնավորապես՝ անհատական բնակելի տունը` հողամասի վրա կառուցված, իր տնտեսական շինություններով, հասարակական նշանակության շինությունը (բնակչության սոցիալական սպասարկման, ինչպես նաև վարչական ու հասարակական կազմակերպությունների տեղակայման համար նախատեսված շինությունը), Հողին ամրակայված այլ անշարժ գույք: Միննույն ժամանակ «Արմեն Մար» ՍՊԸ-ի 2020 թվականին հարկային մարմնում առկա անձնական հաշվի քարտի տվյալների չկատարված ընդհանուր հարկային պարտավորությունները  հասնում էին՝ 2554821 դրամի:

30 մլն 115 հազար դրամ արժեցող «Մարտունու Երևանյան փողոցի երթևեկելի հատվածի ասֆալտապատում և մայթերի կառուցում» ծրագիրն իրականացրել է «Շանթ-Սեյրան» ՍՊԸ-ն: Ընկերության տնօրեն Արմեն Ղուկասյանի եղբայրը՝ Արտուշ Ղուկասյանը, Գեղարքունիքի նախկին փոխմարզպետն է (2003-2012 թթ.): Արտուշ Ղուկասյանի մյուս եղբայրը՝ Ռուբիկ Ղուկասյանը, երկար տարիներ զբաղեցրել է իրանց ծննդավայր Վերին Գետաշենի համայնքապետի պաշտոնը: Բացի այս ծրագրից, «Շանթ-Սեյրանը» Գեղարքունիքի ևս 5 համայնքում է ծրագիր իրականացրել 2020 թվականին: 2019 թվականին Շրջակա միջավայրի նախարարության աշխատակազմի ջրային ռեսուրսների կառավարման գործակալության կողմից մշակվել էր «Շանթ-Սեյրան» ՍՊԸ-ի՝ Գեղարքունիքի մարզի Վաղաշեն համայնքի վարչական տարածքում արդյունաբերական նպատակով ստորերկրյա ջրային ռեսուրսից 2.7 լ/վ ջրաքանակով ջրառի ջրօգտագործման թույլտվության նախագիծը: 2020 թվականին էր ոստիկանության Գեղարքունիքի մարզային  վարչության Մարտունու բաժնում հարուցվել էր քրեական գործ՝ «ՇԱՆԹ-ՍԵՅՐԱՆ» ՍՊԸ-ի կողմից Մարտունի գետի հունի և ափամերձ հատվածում աշխատանքների կատարման փաստի առթիվ: Դրանից ամիսներ առաջ էլ մամուլը ահազանգել էր «ՇԱՆԹ-ՍԵՅՐԱՆ» ՍՊԸ-ի կողմից Մարտունի գետի հունից ավազ և խճաքար հանելու մասին:

Գեղարքունիքի մարզպետարանում իրականացրած ստուգումների արդյունքում դեռևս 2006-2008թթ.-ին Վերահսկիչ պալատը արձանագրել է հավելագրումներ և անորակ աշխատանք՝ կատարված  «Շանթ-Սեյրան» ՍՊԸ-ի կողմից: Վարդենիսի հիվանդանոց տանող ճանապարհի հիմնանորոգման համար ստացած 57,7 մլն դրամից  568 հազար հավելագրում է հայտնաբերվել: Բացի դրանից, 13,3 մլն դրամի չափով կատարված աշխատանքներն անորակ են եղել: