FACT CHECK: առողջապահության նախարարությունը մանիպուլացնում է հանրային կարծիքը

Առողջապահության նախարության ֆեյսբուքյան էջը վերածվել է պատվաստվելու քարոզի հսկայական մեդիա հարթակի: Նախարությունը, բերելով տարբեր զարգացած երկրների օրինակներ, փորձում է համոզել. որ պարտադիր պատվաստումները միջազգային պրակտիկայում ընդունված են: Հասկանալի է, որ այսպիսով գերատեսչությունը ցանկանում է մեղմել իր հասցեին հնչող քննադատությունները, սակայն, հասարակությանը, ըստ էության, տրամադրվում է ոչ ամբողջական ինֆորմացիա:

Դիցուք՝ երեկ նախարարության ֆեյսբուքյան էջում ավետել էին, որ ԱՄՆ նախագահ Ջո Բայդենի հրամանով այսուհետ պետական և մասնավոր ընկերությունների աշխատակիցներին կպարտադրեն պատվաստվել: Տվյալ տեղեկությունը համապատասխանում է իրականությանը:

Սակայն, տպավորություն է ստեղծվում, որ այդ աշխատակիցները զրկված են այլընտրանքից: Մինչդեռ դա, իհարկե, այդպես չէ: ԱՄՆ-ում ընդունված որոշումը ենթադրում է կա՛մ պատվաստում, կա՛մ շաբաթը մեկ ՊՇՌ թեստի հանձնում, որն անվճար է: Հենց այս տեղեկությունն էլ նախարարությունը մոռացել է կամ չի ցանկացել տրամադրել իր ֆեյսբուքյան էջի հետևորդներին: 

Դեռևս 2020 թվականին ԱՄՆ ներկայացուցիչների պալատն ընդունել է համապատասխան օրինագիծ, որը երաշխավորում է ԱՄՆ քաղաքացիների՝ անվճար պատվաստվելու իրավունքը: Հասկանալի է, թե ինչու նախարարությունը չի ցանկանում ողջ ճշմարտությունը ներկայացնել ԱՄՆ-ում պատվաստման քաղաքականության վերաբերյալ, քանի որ մեր երկրում պատվաստման այլընտրանքը՝ ամիսը երկու անգամ սեփական գրպանի հաշվին ՊՇՌ թեստ հանձնելն է: