ՔՊ-ական քաղաքապետերի անցած ուղին. Արարատ Թումանյան

Վարչապետ Նիկոլ Փաշինյանի հուլիսի 14-ի որոշմամբ Մեղրի համայնքի ղեկավարի պաշտոնակատար է նշանակվել Արարատ Թումանյանը։ Վերջինս 46 տարեկան է, ավարտել է «Հրաչյա Աճառյան» համալսարանը, մասնագիտությամբ իրավագետ է։ Ամուսնացած է, ունի երկու զավակ։ Ի դեպ, Թումանյանը «Քաղաքացիական պայմանագիր» կուսակցության Մեղրու տարածաշրջանի պատասխանատուն է։

Վերջինիս «Արագգ» ՍՊԸ-ն Իրանից և Թուրքմենստանից դիզվառելիք է ներկրում: 2016-2017 թվականներին Թումանյանը ակտիվ բողոքում էր ՊԵԿ-ի վարած քաղաքականությունից` պնդելով, որ  ՊԵԿ-ը խոչընդոտում է իր բիզնեսին՝ այդպիսով արտոնյալ պայմաններ ստեղծելով խոշորների՝ «ՖԼեՇ»-ի և «ՍիՓիԷս»-ի համար: Այն ժամանակ, Պետեկամուտների կոմիտեի հաղորդագրությունից հայտնի դարձավ, որ կոմիտեն քրեական գործ էր հարուցել՝ սպառողներին խոշոր չափերով խաբելու դեպքի առթիվ, ու արգելել է մաքսազերծել ներմուծված վառելիքը Թումանյանին պատկանող «Արագգ» ընկերությանը: Ըստ հաղորդագրության, «տարեսկզբից ներկրած վառարանային վառելիքն օրենքը շրջանցելով [ընկերությունը] փորձել է իրացնել իբրև կերոսին ու դիզելային վառելիք: Ներկրողը նաև հաշիվ-ապրանքագիր է դուրս գրել մեկ ընկերության անունով, սակայն հարկային օրենսդրությունը խախտելով՝ փաստացի մատակարարել է մեկ ուրիշին»: 

Թիմակցին այն ժամանակ պաշտպանել էր ընդդիմադիր պատգամավոր Նիկոլ Փաշինյանը, ով նամակ էր հղել վարչապետ Կարեն Կարապետյանին` պահանջելով խոչընդոտներ չհարուցել Թումանյանի ընկերության համար: «Փաստորեն, ինչպես հայտնի գրքում է ասվում, որոշ կենդանիներ ավելի հավասար են, քան այլ կենդանիները», ֊ գրել էր Փաշինյանը։ 2018 թվականի տվյալներով` «Արագգ» ՍՊԸ-ն շուրջ 6 միլիոն դրամի չկատարված հարկային պարտավորություններ ուներ: 2019-ին Ազդարար համակարգում տեղադրվել է «ԱՐԱԳԳ» ՍՊԸ-ն սնանկ ճանաչելու, կառավարիչ և պարտատերերի առաջին ժոողով նշանակելու մասին որոշումը, սակայն, թե ինչ է տեղի ունեցել դրանից հետո, հասկանալի չէ: