Քադաֆին աշակերտուհիներին վերածում էր սեքս-ստրկուհիների

Ֆրանսիայում գիրք է հրապարակվել լիբիացի բռնապետ-մանկապիղծի մասին։ 

Ֆրանսիացի լրագրողուհին հրատարակել է գիրք, որտեղ պատմում է Լիբիայի տապալված և սպանված նախագահ Մուամար Քադաֆիի սեռական հանցագործությունների մասին։ Համաձայն հավաքված նյութերի՝ Քադաֆին ունեցել է մի ամբողջ հարեմ, որոնց մեջ եղել են նույնիսկ առևանգված դպրոցականներ, այդ մասին հայտնում է The Daily Mail ը։

Գնդապետ Քադաֆիի դաժան հանցագործությունները հայտնի են դարձել նրա էլեկտրոնային արխիվի ուսումնասիրության արդյունքում։ Անցյալ շաբաթ այդ նյութերը հրապարակվել են «Քադաֆիի հարեմի զոհերը» գրքում, որը հեղինակել է լրագրող Աննիկ Կոժանը։ Ֆրանսիացի լրագրողուհու գրքում Մուամար Հայրիկը, ինչպես նա սիրում էր իրեն անվանել, ներկայացվում է որպես նողկալի սադիստ և այլասերված, որի համար բռնությունը սովորական երևույթ է։ Գրքում խոսվում է մի  քանի զոհերի  պատմության մասին։ Դրանք  մանկահասկան  աղջիկներ  են, որոնց Քադաֆին առևանգել է հայրական տնից  և ստիպել դառնալ իր ստրկուհիները։  Գրքում խոսվում է  նաև սեռական բռնության զոհ դարձած տղաների մասին։ Նույնիսկ Քադաֆիի ռեժիմի տապալումից հետո զոհերի դրությունը չբարելավվեց։ Ընտանիքները հրաժարվել են հետ ընդունել նրանց, համարելով, որ նախամուսնական սեռական հարաբերություններով աղջիկները խայտառակել են իրենց ընտանիքների անունը։

Քադաֆիի համար սեռական բռնությունը միջոց էր իշխելու ոչ միայն կանանց, այլև այն տղամարդկանց, որոնց կանանց և աղջիկներին նա ենթարկում էր սեռական բռնության, գրում է Կոժանը: