«Մեզ համար մեծ պատիվ էր նպաստել ղարաբաղյան պատերազմում Ադրբեջանի հաջողություններին». Էրդողանի փեսա

Շատ երկրներ արդեն արտադրում են նորագույն անօդաչու կործանիչներ: Մենք կանխատեսում ենք, որ քսան տարի հետո կավարտվի F-16- ի և նույնիսկ F-35-ի դարաշրջանը, և օդուժում այլևս օդաչուներ չեն լինի: Այս կարծիքը CNN Turk-ին տված հարցազրույցում հայտնել է թուրքական պաշտպանական Baykar ընկերության տնօրեն, Թուրքիայի նախագահ Ռեջեփ Թայիփ Էրդողանի փեսան`  Սելջուկ Բայրաքթարը:

«Մենք հավատում ենք, որ նույնիսկ բազմաֆունկցիոնալ կործանիչների հինգերորդ սերունդը կավարտվի: Ապագայի ամենահզոր ռազմա-օդային միջոցները կլինեն անօդաչու թռչող սարքերը», - ասել է նա:

«Մենք ներկայումս մեծ հետաքրքրություն ենք ցուցաբերում այս տեխնոլոգիայի նկատմամբ: Տարիների ընթացքում մեր ընկերության եկամուտների ավելի քան յոթանասուն տոկոսը գոյացել է արտահանումից: Սա ռեկորդ է Թուրքիայի պաշտպանական արդյունաբերության համար», - ավելացրել է թուրքական անօդաչու թռչող սարքեր արտադրող ընկերության ղեկավարը:

Ավելին, Սելջուկ Բայրաքթարը հիշել է, որ իր եղբայր Հալուկ Բայրաքթարը «Ուկրաինայում արժանացել է պատվո դիպլոմի և ստացել մեդալ. «Հայրս, եղբայրս և ես շքանշաններ ենք ստացել Ղարաբաղյան պատերազմից հետո»,- հավելել է նա:

«Մեզ համար մեծ պատիվ էր նպաստել ղարաբաղյան պատերազմում Ադրբեջանի հաջողություններին», - խոստովանել է Էրդողանի փեսան: