Հայաստանը օգնելու է սիրիահայերին

Հայաստանի արդյունաբերողների և գործարարների (գործատուների) միությունը մտահոգված է Սիրիայում մեր հայրենակիցների ճակատագրով, ովքեր իրեց եռանդն ու միջոցները ներդրել են իրենց երկրորդ հայրենիքի բարգավաճմանը՝ դառնալով Սիրիայի արժանավոր քաղաքացիներ, ասվում է ՀԱԳ(Գ)Մ նախագահ Արսեն Ղազարյանի հայտարարության մեջ:

«Քաղաքական վերջին իրադարձությունների պատճառով այսօր նրանք հայտնվել են դժվարին կացության մեջ և իրենց հայացքներն ուղղել են մայր Հայրենիքին։Մեր ժողովուրդը և գործարարներս չենք կարող անհաղորդ մնալ նրանց հոգսերին ու խնդիրներին, ինչի առնչությամբ Միությունը կոչով դիմել էր հայ գործարարներին իրենց վերաբերմունքն արտահայտելու։ Մեր միության անդամները, հայ գործարարի բարոյական կերպարին յուրահատուկ պատվախնդրությամբ, պատրաստակամություն են հայտնել եղբայրական ձեռք մեկնելու սիրիահայերին, ովքեր Սփյուռքում միշտ էլ զորավիգ են եղել Հայաստանում իրականացվող հայրենաշեն ծրագրերին։

Միության անդամները միակարծիք պատրաստակամություն հայտնեցին աջակցել մեր հայրենակիցներին ամենատարբեր ոլորտներում՝

1)Տրամադրել աշխատատեղ կամ հնարավորության դեպքում ստեղծել նոր աշխատատեղեր սիրիահայերի համար:

2)Խորհրդատվությամբ, Միության կապերն ու մյուս լծակները օգտագործելով՝ աջակցել սիրիահայ գործարարներին Հայաստանում բիզնես հիմնելու, նրանց գործող բիզնեսը արտերկրից Հայաստան տեղափոխելու գործում:

3)Աջակցել Միության անդամ ընկերություններում ներդրումներ կատարել ցանկացողներին, նպաստել նրանց ինտեգրմանը Հայաստանի գործարար և բարոյահոգեբանական մթնոլորտին:

4)Կազմակերպել մասնագիտական սեմինարներ կամ վերաորակավորման ուսուցման դասընթացներ սկսնակ գործարարների համար:

5)Գործարարությամբ զբաղվողներին ծանոթացնել Հայաստանի տնտեսական օրենսդրությանը, փոփոխություններին՝ նոր իրավիճակներում արագ և ճիշտ կողմնորոշվելու համար:

6)Անհրաժեշտության դեպքում հնարավորության սահմաններում աջակցել սիրիահայ ուսանողներին կրթաթոշակների վճարման գործում։