Fact Check. Քերոբյանի «գուշակություններն» ու իրական պատկերը

Էկոնոմիկայի նախարար Վահան Քերոբյանը մարտի 25-ին, հղում կատարելով Վիճակագրական Կոմիտեի տվյալներին, հայտարարել էր տնտեսության վերականգնման մասին:

«Վիճակագրական կոմիտեն հրապարակեց 2021թ․ փետրվարի տնտեսական ակտիվության ցուցանիշը՝ -5,3%: Հաշվի առնելով, որ անցած տարվա փետրվարն ուներ մեկ օր ավել, Հայաստանի տնտեսությունը համարյա վերականգնվել է։ Ու դա դեռ զրոյին մոտ տուրիզմի պարագայում։ Վերահաստատում եմ իմ նպատակը՝ երկնիշ տնտեսական աճ», - ասված էր Քերոբանի ֆեյսբուքյան գրառման մեջ:

Իսկ ի՞նչ պատկեր է իրականում: Ընթացիկ տարվա առաջին եռամսյակում 3,3 տոկոսով ՀՆԱ-ի անկում է տեղի ունեցել։ 2020 թվականի նույն ժամանակահատվածի համեմատ ՀՆԱ-ն կրճատվել է 34․8 տոկոսով, ինչը բավականին անհանգստացնող ցուցանիշ է։

Վահան Քերոբյանը մայիսի 25-ին ֆեյսբուքյան իր էջում գրառմամբ տեղեկացրեց, որ տնտեսական ակտիվության ցուցանիշը (ՏԱՑ) նախորդ տարվա (2020 թ.) ապրիլի համեմատ աճել է 23․2 տոկոսով, իսկ առաջին չորս ամիսներին՝ 2․6 տոկոսով: Վահան Քերոբյանի գրառման մեջ նշված տվյալները թեև ճիշտ են, սակայն՝ մանիպուլյատիվ։ Մասնավորապես, հաշվի առնելով նախորդ տարվա նշված ժամանակահատվածում Հայաստանում և աշխարհում կորոնավիրուսով պայմանավորված սահմանափակումները և տնտեսության գրեթե բոլոր ճյուղերում արձանագրված խոշոր անկումը, 2020 թ. ապրիլի համեմատ ՏԱՑ-ի 23․2 տոկոսանոց աճը բավական օրինաչափ է։ Այսինքն՝ այս աճը պայմանավորված է ոչ թե այս տարվա ապրիլին տնտեսության աննախադեպ ակտիվությամբ, այլ նախորդ տարվա նույն ժամանակահատվածում արձանագրված 17․2 տոկոսանոց անկումով։

Ինչը նշանակում է, որ Վահան Քերոբյանի մի շարք պնդումներ չեն համապատասխանում իրականությանը, ինչպես նաև չեն հաստատվում վերջինիս՝ երկնիշ տնտեսական աճի կանխատեսումները: