Հայ-գերմանական մշակութային համագործակցությունը դրական արդյունքներ է տվել

Այսօր ՀՀ մշակույթի նախարար Հասմիկ Պողոսյանն ընդունեց Գերմանիայի Դաշնային Հանրապետության Սաքսոնիա-Անհալթ երկրամասի մշակույթի նախարար Շտեֆան Դորգելոհի գլխավորած պատվիրակությանը: Ողջունելով հյուրերին՝ ՀՀ մշակույթի նախարարը խոսեց երկու երկրների միջև առկա բազմաշերտ համագործակցության մասին: Փոխադարձ ողջույնի խոսքում պրն. Դորգելոհը տիկին Պողոսյանին հրավիրեց իրենց երկրամաս՝ շարունակելու ու ավելի զարգացնելու համագործակցությունը: Ընդգծելով մշակույթի ոլորտում հայ-գերմանական կայուն համագործակցության պահպանման և ընդլայնման միտումները՝ նախարարը հյուրերին տեղեկացրեց, որ «Գիտության, կրթության և մշակույթի բնագավառներում համագործակցության մասին» 2005թ. ստորագրված համատեղ հայտարարությունը տվել է իր դրական արդյունքը.

• Ս.թ. ապրիլի 15-ից մայիսի 20-ը Հալե քաղաքի «Kunstforum»-ում բացվել է «Տառարվեստ և պատկերի հրաշքը. Հայ գրատպության 500-ամյակ» խորագրով ցուցահանդես՝ Սաքսոնիա-Անհալթի մշակույթի նախարարության, Բեռլինի հանրային գրադարանի և Հալեի Մարտին-Լյութեր համալսարանի «Մեսրոպ» հայագիտական կենտրոնի աջակցությամբ: Ցուցահանդեսի բացման արարողությանը մասնակցել է ՀՀ մշակույթի փոխնախարար Արթուր Պողոսյանի գլխավորած պատվիրակությունը, ինչպես նաև՝ ԳԴՀ արտաքին գործերի պետնախարար Կորնելիա Փիփերը:
• Ապրիլի 16-22-ը Հովհ.Շարամբեյանի անվան ժողովրդական ստեղծագործության կենտրոնի ցուցասրահում բացվել է Հալեի «Թալշտրասե» մշակութային միության «CaIl out Art» մեծածավալ գոբելենների ցուցահանդեսը:
• Հուլիսի 6-17-ը Հայաստանի ազգային պատկերասրահում հայ արվեստասերներին ներկայացվել են գերմանական «Wallauer Fachwerk»-ի անդամների աշխատանքները:
• Հայ տպագիր գրքի 500-ամյակին նվիրված տոնակատարության համատեքստում օգոստոսի 27-ից սեպտեմբերի 2-ը Հայաստանում կայացել են Սաքսոնիա-Անհալթի գրականության օրեր, որի շրջանակում տեղի են ունեցել գրողների և հրատարակիչների հանդիպումներ և սեմինարներ Երևանում և Արցախում, իսկ օգոստոսի 29-ին Կամերային երաժշտության տանը կայացել է «Արդի հայ պոեզիա» (գերմաներեն) և «Արդի գերմանական պոեզիա» (գերմաներեն-հայերեն զուգադիր) հատընտիրների (անթոլոգիա) շնորհանդեսը: Ծրագրի ավարտին «Ֆրիդրիխ Բոդեքեր» միության նախագահ, բանաստեղծ Յուրգեն Յանկովսկին պարգևատրվել է ՀՀ մշակույթի նախարարության պատվոգրով:
• Սեպտեմբերի 10-17-ը ՀՀ մշակույթի նախարարության հրավերով Հայաստանում էր Բոննի քաղաքապետարանի պատվիրակությունը՝ Բոննի քաղաքապետարանի մշակույթի վարչության պետ Անդրեաս Լյոշի գլխավորությամբ:
• Մշակութային համատեղ ծրագրի շրջանակում «Euro Theater Central Bonn» թատերախումբը և «Cernä & Vanek Dance» ժամանակակից պարի թատրոնը Հայաստանում խաղացին 2 ներկայացում և իրականացրեցին սեմինարներ՝ Երևանի մնջախաղի պետական թատրոնի և Փոքր թատրոնի արվեստագետների հետ: Ձեռք են բերվել նաև 2013 թ. ընթացքում իրականացվելիք մի շարք ծրագրերի վերաբերյալ պայմանավորվածություններ , քննարկվել է Ցեղասպանության 100-ամյակին նվիրված ծրագիր: Հանդիպման ընթացքում ՀՀ մշակութի նախարարն առանձնակի ուշադրության արժանացրեց ս.թ. սեպտեմբերի 5-7-ը ԳԴՀ-ում ՀՀ դեսպանության և Հումբոլդտի համալսարանի ՝ մեծն Կոմիտասին նվիրված լայնածավալ համատեղ միջոցառումները, այդ թվում՝ Կոմիտասի հուշատախտակի բացումը:

Քննարկվեցին մի քանի պատվիրակությունների փոխայցերին վերաբերող մանրամասներ: Կարևորվեց նաև մեր երկրների համագործակցությունը հուշարձանների հետազոտության ոլորտում: 2011թ-ից Ջերմուկում և Սիսիանում մեկնարկած հայկական ժայռապատկերների հետազոտության հայ-գերմանական համատեղ ծրագիրը, որը ղեկավարում են Սաքսոնիա-Անհալթ երկրամասի պրոֆեսոր Հարալդ Մելլերը և Հուշարձանների պահպանության և հնագիտության վարչության պետ /Նախապատմական թանգարանի տնօրեն/, ՀՀ ԳԱԱ «Հնագիտության և ազգագրության ինստիտուտ»-ի տնօրեն Պավել Ավետիսյանը, նպատակ ունի փաստագրել և իմաստավորել այդ ժառանգությունը: Նախատեսված է ստեղծել հայկական ժայռապատկերների ինտերնետային տվյալների բազա, ինչը կօժանդակի նաև Հայաստանում տուրիզմի զարգացմանը: 2012 թ. օգոստոսին փոքր քառաթիռ /կվադրոկոպտեր/ սարքի միջոցով կատարվել են օդային նկարահանումներ: Պատվիրակության անդամ, պրոֆեսոր Հարալդ Մելլերը հանդիպման ժամանակ դրանք ներկայացրեց ՀՀ մշակույթի նախարարի ուշադրությանը, հիշեցնելով, որ գործ ունենք ՀՀ մշակութային ժառանգության անգնահատելի արժեքների՝ հնագույն ժայռապատկերների հետ, որոնք առաջիկայում կներառվեն ՅՈՒՆԵՍԿՕ-ի համաշխարհային ժառանգության ցանկում: Հասմիկ Պողոսյանը պրոֆեսոր Հարալդ Մելլերին պարգևատրեց ՀՀ մշակույթի նախարարության Ոսկե մեդալով:

Այնուհետև նախարարը հյուրերին տեղեկացրեց, որ Թբիլիսիի Գյոթեի անվան ինստիտուտի և ս.թ. ապրիլին բացված ինստիտուտի Երևանյան գրասենյակի հետ 2012 թ. գրքի համաշխարհային մայրաքաղաք Երևանում բազմաթիվ միջոցառումներ են կազմակերպվում: Այս տարի ևս Հայաստանը կմասնակցի Ֆրանկֆուրտի գրքի միջազգային տոնավաճառին /հոկտեմբերի 10-14-ը /:

Երկու նախարարների հանդիպման ընթացքում առանձնացվեցին մի քանի ծրագրեր՝ մեր երկրների միջև դիվանագիտական հարաբերությունների 20-ամյակին նվիրված միջոցառումները, Շտուտգարդում կայանալիք ՀՀ մշակույթի օրերը, Մայնցի Գուտենբերգի անվան թանգարանում նախատեսված հայ հնատիպ գրքի ցուցահանդեսը:

Սաքսոնիա-Անհալթ երկրամասի մշակույթի նախարար Շտեֆան Դորգելոհն իր հերթին փաստեց, որ 2008 թ. սկսած համագործակցությունը անընդհատ ձեռք է բերում նոր որակ՝ նախ երաժշտական, ապա՝ գրական և մյուս ոլորտներում, և լիահույս է, որ հնագիտության ոլորտում համագործակցությունը ևս հաջողություններ կգրանցի: Նախարարը կարևորեց նաև իրենց երկրամասի դպրոցականներին մեր մշակույթի հետ ծանոթացնելու գործը:

ՀՀ մշակույթի նախարարի և Գերմանիայի Դաշնային Հանրապետության Սաքսոնիա-Անհալթ երկրամասի մշակույթի նախարար Շտեֆան Դորգելոհի գլխավորած պատվիրակության հանդիպումն ավարտվեց հուշանվերների և գրքերի հանձնումով: