«ՀԺ». Հրդեհն ու ՀՀԿ-ն դառնում են անբաժանելի «գործընկերներ»

Հրդեհն ու ՀՀԿ-ն դառնում են անբաժանելի «գործընկերներ»: Սեպտեմբերի 22-ին հերթական միջադեպն է գրանցվել: Կեսօրին մոտ, ժամը 11.27-ին ՀՀ ԱԻՆ-ում ահազանգ էր ստացվել, որ այրվում է ՀՀԿ կենտրոնական գրասենյակի շենքի տանիքը: Չորս մարտական հաշվարկով և ավտոսանդուղքով տեղ հասած հրշեջներին հաջողվել է ժամը 12.02-ին մեկուսացնել կրակը, իսկ 16.06-ին՝ մարել: Պարզվել է, որ հրդեհի հետևանքով այրվել էին շենքի փայտյա կառուցատարերը և ջերմամեկուսիչ շերտը' 10 քմ: Բարեբախտաբար, տուժածներ չկան:

«Հայկական ժամանակ»-ը հիշեցնում է, որ սա նմանատիպ առաջին դեպքը չէ: Այս տարվա մայիսի 22-ին ևս Հանրապետականի կենտրոնական գրասենյակում հրդեհ էր բռնկվել: Ամբողջությամբ հրդեհվել էին գրասենյակի տանիքը և երկրորդ հարկը: ՀՀ ԱԻՆ պետական հրդեհային և տեխնիկական անվտանգության տեսչության բաժնի պետ Սերգեյ Հարապետյանը երեկ «ՀԺ»-ի թղթակցին հայտնեց, որ ըստ խիստ նախնական վարկածի, սեպտեմբերի 22-ին բռնկված հրդեհի պատճառ էր դարձել շենքում պատուհաններ տեղադրելիս՝ եռակցման աշխատանքների ժամանակ հրդեհային անվտանգության կանոնների խախտումը: Պատճառների մասին ավելի մանրակրկիտ տեղեկություններ ստանալու համար նշանակվել է փորձաքննություն, որի արդյունքները հայտնի կդառնան առնվազն 15-20 օրից: Սերգեյ Հայրապետյանը երեկ ասել է նաև, որ մայիսի 22-ի հրդեհի պատճառը էլեկտրատեխնիկական էր՝ էլեկտրական հաղորդալարերի կարճ միացման հետևանք:

Հիշեցնենք, որ մի քանի օր առաջ էլ կրակի բաժին էր դարձել ՀՀԿ ԱԺ համամասնական ցուցակի ներկայացուցիչ Ռուբեն Հայրապետյանի ընտանիքին պատկանող «տխրահռչակ» դարձած «Հարսնաքարի» տանիքը: