«Հրապարակ». Սևանի քաղաքապետի խոստումները

Կիրակի հանրապետության մի շարք համայնքներում ՏԻՄ ընտրություններ էին: Թերևս միայն Եղեգնաձորում անակնկալ ունեցանք՝ ԲՀԿ թեկնածուն հաղթեց գործող ՀՀԿ-ական քաղաքապետին: Չնայած բոլոր միջոցները գործադրվեցին, սակայն իշխող կուսակցությունը հաջողության չհասավ: Սա խոսում է ընդամենը մի բանի մասին, որ եթե նրանց դիմաց ինչ-որ մեկը կանգնում է՝ պինդ, վստահ, աներեր, ապա հաղթելն այնքան էլ բարդ չէ։

Հիմա դառնանք, այլ օրինակ բերենք՝ Սևան քաղաքի օրինակը, որտեղ ՀՀԿ-ն տեռորով ու ճնշումներով հանել տվեց բոլոր թեկնածուներին, և չհայտնվեց որևէ մեկը, որը համարձակություն ունենար մնալու և մրցելու հայտնի Ուդոյի՝ Ռուդիկ Ղուկասյանի հետ, որի նկատմամբ սևանցիք ահավոր վատ էին տրամադրված: Դա երևում է նաև նրա հավաքած ձայներից. 19 հազար ընտրողից՝ 7 հազարից մի քիչ ավելի ձայն: Սևանցիները, ըստ էության, բոյկոտեցին քաղաքապետի ընտրությունները, բայց Ուդոն հաղթեց:

Երեկ Սևանի բնակիչներից մեկը հետաքրքիր հաշվարկ է արել և վերլուծել Ռուդիկ Ղուկասյանի նախընտրական խոստումները: Ստացվել է, որ վերջինս այս տարի Սևանում 3 մլրդ դրամի ներդրում է կատարելու, մինչդեռ ամբողջ Գեղարքունիքի մարզը տարեկան մոտ մեկ մլրդ դրամի բյուջե ունի:
«Ասում է՝ ամբողջ ճանապարհը սարքում եմ, որը մեկ մլրդ արժե: Տանիքները, ասում է, տարեկան եսիմինչքան փոխելու եմ, որն էլի մեկ մլրդ արժե: Մի այդքանի էլ ջեռուցում է ասել, որ կանցկացնի: Եթե մարդիկ տարեկան մեկ մլրդ դրամ են կարողանում ամբողջ մարզին փող տալ, էդ ո՞վ դարձավ Սևանի քաղաքապետը, որ կարողանա 3 միլիարդ բերի»,- հարցրել է մեր զրուցակիցը: Ի դեպ, իր նախընտրական հանդիպումների ժամանակ Ռուդիկ Ղուկասյանը հաճախ ակնարկել է, որ նախագահ Սերժ Սարգսյանի աջակցությամբ է այդ միլիարդները բերելու քաղաք: