Ադրբեջանը հայց է ներկայացրել Հայաստանի դեմ ՄԱԿ-ի Միջազգային դատարանում
Արտաքին ՔաղաքականԱդրբեջանը հայց է ներկայացրել Հայաստանի դեմ ՄԱԿ-ի Միջազգային դատարանում՝ Երևանին մեղադրելով Ռասայական խտրականության բոլոր ձևերի վերացման միջազգային կոնվենցիայի խախտման մեջ: Այս մասին հայտնել է Հաագայում գտնվող դատարանի մամուլի ծառայությունը:
«Ադրբեջանի Հանրապետությունն այսօր վարույթ է հարուցել Հայաստանի Հանրապետության դեմ Արդարադատության միջազգային դատարանում՝ ՄԱԿ-ի հիմնական իրավական մարմնում, որը վերաբերում է ռասայական խտրականության բոլոր ձևերի վերացման միջազգային կոնվենցիայի մեկնաբանմանը և կիրառմանը»,֊ասվում է դատարանի հայտարարության մեջ, որը տեղադրված է իր կայքում: Ադրբեջանը հայտարարում է, որ «Հայաստանի քաղաքականությունը և նրա էթնիկ մաքրումը, մշակութային ժառանգության ոչնչացումը և էթնիկ ատելության հրահրումը ադրբեջանցիների նկատմամբ համակարգված կերպով ոտնահարում են ադրբեջանցիների իրավունքները և ազատությունները»:
Հայցը պարունակում է նաև Հայաստանի դեմ ժամանակավոր միջոցներ կիրառելու պահանջ՝ մինչև այս հայցի վերաբերյալ Արդարադատության միջազգային դատարանի որոշումը:
Ինչպես հայտնի է, սեպտեմբերի կեսերին Հայաստանը նախաձեռնել է դատավարություն Ադրբեջանի դեմ ՄԱԿ-ի Միջազգային դատարանում`ռասայական խտրականության բոլոր ձևերի վերացման միջազգային կոնվենցիայի համաձայն: