Թուրքիայի և Հայաստանի միջև հարաբերությունների կարգավորման ցանկացած քայլ Անկարան կքննարկի Ադրբեջանի հետ․ Չավուշօղլու
ԹուրքիաԹուրքիայի և Հայաստանի միջև հարաբերությունների կարգավորման ցանկացած քայլ Անկարան կքննարկի Ադրբեջանի հետ: Այս մասին այսօր՝ սեպտեմբերի 27 -ին, հայտարարել է Թուրքիայի ԱԳՆ ղեկավար Մևլութ Չավուշօղլուն՝ Ստամբուլում իր ադրբեջանցի գործընկեր Ջեյհուն Բայրամովի հետ համատեղ մամուլի ասուլիսում, հաղորդում է «Անադոլու» գործակալությունը:
Անկարան դրական է ընկալում Երևանի հայտարարությունները հարաբերությունները կարգավորելու պատրաստակամության մասին, սակայն ներկայումս դրան հասնելու կոնկրետ ծրագիր չկա, նշել է Թուրքիայի արտգործնախարարը:
«Հայաստանի հետ հարաբերությունները կարգավորելու համար ծրագիր դեռևս չկա: Փաշինյանը հանդես եկավ հայտարարություններով, մենք դրանք դրական ընդունեցինք: Ադրբեջանը հանդես եկավ Հայաստանի հետ հաշտության պայմանագրի առաջարկով: Մինչ այժմ Հայաստանից ոչ մի դրական պատասխան չի ստացվել: Բայց մենք միասին կքննարկենք և ցանկացած քայլ կձեռնարկենք Ադրբեջանի հետ համատեղ», - հայտարարել է Մևլութ Չավուշօղլուն: