Ռոբերտ Քոչարյանն ավելի է համապատասխանում ընդդիմադիր կեցվածքին. Արամ Սարգսյան (Տեսանյութ)

«ՏԻՄ ընտրություններին մեր կուսակցությունը չի մասնակցել, քանի որ Խորհրդարանական ընտրություններից հետո որևէ փոփոխություն չտեսանք և կարիք չտեսանք այդ իմիտացիային մասնակցել»։ Այս մասին լրագրողների հետ հանդիպմանն ասաց ՀԴԿ նախագահ Արամ Սարգսյանը։

Ըստ բանախոսի՝ կուսակցության ներսում դեռ համագումար չի եղել և դեռ որոշված չէ, թե ինչ ձևաչափով կմասնակցեն նախագահական ընտրություններին, բայց նա միանշանակ չի առաջադրի իր թեկնածությունը։

Ինչ վերաբերում է որպես ընդդիմության միասնական թեկնածու Գագիկ Ծառուկյանի առաջադրման վարկածին, Արամ Սարգսյանն ասաց.«Պարոն Ադիբեկյանի հարցումները թողնենք իր խղճին, բայց ինչ վերաբերում է ընդդիմադիր միասնական թեկնածուին, շատ կզարմանայի, եթե Գագիկ Ծառուկյանը  լիներ այդ թեկնածուն։ Այդ կուսակցությունը որպես ընդդիմադիր ուժ չի եղել, կոալիցիայից դուրս գալը դեռ մի քանի տարի պետք է հաստատվի։ Այս ամենի մեջ որոշակի իմիտացիա կա, երկար տարիներ լինելով նույն թիմի մեջ՝ հանկարծ սկսեցին պետության ներսում թերությունները տեսնել և առանձին գիծ բացել»։

Ըստ բանախոսի՝ Ռոբերտ Քոչարյանն ավելի է համապատասխանում ընդդիմադիր կեցվածքին։ 

Անդրադառնալով Կառավարության նիստում Սերժ Սարգսյանի ելույթին՝ Արամ Սարգսյանը նկատեց, որ այսօր բյուջեից գողացված են մեծ չափերի գումարներ, եթե դրանք չհայտնաբերվեն մոտակա տաս օրվա ընթացքում, կնշանակի, որ ելույթը հերթական խաղն էր։

Իսկ այն հարցին, թե սեփական թեկնածու չունենալու դեպքում կուսակցությունն ում կսատարի, Արամ Սարգսյանը հայտարարեց, որ գաղափարական տեսանկյունից հայտնի թեկնածուներն այդքան էլ ընդունելի չեն իրենց կողմից, բայց եթե Սերժ Սարգսյանն իրական քայլեր անի իրավիճակը փոխելու համար, հնարավոր է որոշում կայացվի գործող նախագահին սատարելու հարցում։