Վրաստանը Բաքվի հետ քննարկել է Արցախի՝ Ադրբեջանի վերահսկողության տակ անցած տարածքների վերականգնմանը մասնակցելու հնարավորությունները

Չորեքշաբթի Բաքվում կայացած ադրբեջանա-վրացական առեւտրատնտեսական համագործակցության միջկառավարական հանձնաժողովի հանդիպման ժամանակ մի շարք համաձայնագրեր են ստորագրվել: Այս մասին Twitter-ում հայտարարել է Ադրբեջանի էկոնոմիկայի նախարար Միքայիլ Ջաբբարովը, հայտնել է Minval.az-ը:

«Ստանդարտացման եւ չափագիտության, համապատասխանության գնահատման, ինչպես նաեւ փոխըմբռնման հուշագրերի մասին համաձայնագիր է ստորագրվել Ադրբեջանի արտահանման եւ ներդրումների խթանման հիմնադրամի (AZPROMO), Փոքր եւ միջին բիզնեսի զարգացման գործակալության (KOBIA) եւ Վրաստանի նմանատիպ կառույցների միջեւ», - նշել է նախարարը: 

Նրա խոսքով, Ադրբեջանի և Վրաստանի միջև տնտեսական համագործակցության համատեղ միջկառավարական հանձնաժողովի նիստում քննարկվել են առևտրատնտեսական համագործակցության ընդլայնման հարցեր, նոր նախագծեր, ինչպես նաև վրացական ընկերությունների մասնակցությունն Արցախի՝  44-օրյա պատերազմի հետևանքով Բաքվի վերահսկողության տակ անցած տարածքների վերականգնմանը:

Վրաստանի ԱԳ նախարար Դավիթ Զալկալիանին իր հերթին հայտարարել է, որ ոլորտային համագործակցության վերաբերյալ 6 փաստաթուղթ է ստորագրվել ադրբեջանա-վրացական միջկառավարական տնտեսական հանձնաժողովի նիստում, որը տեղի է ունեցել վերջին 10 տարվա ընթացքում առաջին անգամ, նշել է «Ազերի Պրես» գործակալությունը: Նախարարը նշել է, որ ստորագրված փաստաթղթերը նպաստելու են երկարաժամկետ խաղաղության եւ կայունության հաստատմանը, կարեւոր նախագծերի իրականացմանը: Նա նաեւ նշել է, որ Վրաստանի վարչապետի եւ պատվիրակության այցը Ադրբեջան բավականին հաջող է ընթացել: