Կպահպանվի տաք և առանց տեղումների եղանակը

«Հայաստանի ողջ տարածքում մոտակա օրերին կպահպանվի տաք և առանց տեղումների եղանակը»: Այս մասին այսօր լրագրողների հետ հանդիպման ժամանակ ասաց ԱԻՆ Հիդրոմետ ծառայության օդերևութաբանական կանխատեսումների բաժնի պետ Գագիկ Սուրենյանը:

Վերջինիս խոսքերով՝ հանրապետության տարածք կներթափանցեն արևադարձային տաք հոսանքներ, որի արդյունքում սեպտեմբերի 25-26-ը օդի ջերմաստիճանը կբարձրանա 2 աստիճանով. «Ամենատաք եղանակը կգրանցվի Արարատյան դաշտավայրում ու Սյունիքի հովիտներում՝ մինչև 30 աստիճան տաքություն»:

Գագիկ Սուրենյանի փոխանցմամբ՝ սեպտեմբերի 28-ից ներթափանցող ցուրտ հոսանքների հետևանքով հյուսիս-արևելյան շրջաններում օդի ջերմաստիճանը կնվազի 6-8, իսկ հանրապետության մյուս շրջաններում՝ 2-4 աստիճանով: 

«Հոկտեմբերին հանրապետության ողջ տարածքում ջերմաստիճանը կլինի նորմայից մեկ աստիճան բարձր: Տեղումների քանակը կանխատեսվում է նորմայի սահմաններում, իսկ դա նշանակում է, որ հանրապետությունում սպասվում են բավականին առատ տեղումներ»,-ասաց Գուրգեն Սուրենյանը: