Հիպերտոնիայի անսպասելի հետևանքներ են հայտնաբերվել

«Զարկերակային գերճնշում» ախտորոշված ​​մարդկանց մոտ գլխուղեղն ավելի փոքր է և ավելի հավանական է, որ նրանց մոտ կարող է զարգանալ դեմենցիա, ասված է Ամերիկյան սրտաբանական ասոցիացիայի «Հիպերտենզիա» ամսագրում այսօր հրապարակված հետազոտության մեջ: Ավելին, որքան շուտ նրանց մոտ առաջանա արյան բարձր ճնշում, այնքան բարձր է այս ռիսկը:

Ավստրալիայի և Չինաստանի գիտնականները, Մելբուրնի համալսարանի պրոֆեսոր Մինգգուանգ Հեյի գլխավորությամբ, ուսումնասիրել են, թե ինչպես է վաղ տարիքում ախտորոշված ​​արյան բարձր ճնշումը ազդում ուղեղի կառուցվածքի և ծերունական թուլամտության ռիսկի վրա: Որպես տեղեկատվության աղբյուր՝ հեղինակներն օգտագործել են բրիտանական Biobank-ի տվյալները՝ տվյալների բազա, որը պարունակում է Մեծ Բրիտանիայից մոտ կես միլիոն կամավոր մասնակիցների առողջության մանրամասն տեղեկություններ:

Հեղինակները կարծում են, որ երիտասարդ տարիքում արյան բարձր ճնշման մեկնարկը վերահսկելու կամ հետաձգելու միջոցներ ձեռնարկելը կարող է նվազեցնել դեմենցիայի ռիսկը, և դա պետք է լինի բժշկական զննման ծրագրերի ուշադրության կենտրոնում:

Հետաքրքիր է, որ ի տարբերություն անոթային թուլամտության՝ գիտնականները ոչ մի կապ չեն գտել հիպերտոնիայի ախտորոշման տարիքի և Ալցհեյմերի հիվանդության զարգացման ռիսկի միջև, որը տկարամտության տեսակ է՝ կապված սպիտակուցների հետ, որոնք խաթարում են ուղեղի աշխատանքը: