Ամեն օր թշնամու վայրենիները մոտենում են ցանցին և սկսում են աղմկել, գոռալ և հոխորտալ․ ԱՀ ԱԺ պատգամավոր

ԱՀ ԱԺ պատգամավոր Մետաքսե Հակոբյանը լրագրողների հետ զրույցում պատմել է, թե ինչպես են ընթանում գյուղատնտեսական աշխատանքներն Արցախում և մարդիկ ինչ փորձություններ են ստիպված հաղթահարում՝ բերքը հավաքելու համար։ 

«Երբ ասում ենք «խաղաղ ժամանակ» գիտակցում ենք, որ դա ՀՀ վարչապետի հռչակած խաղաղությունն է։ Մնացած բոլորը, որոնք ապրում են Արցախում, ինչու ոչ՝ նաև Սյունիքում, գիտակցում են, որ խաղաղ ժամանակներ դեռ երկար չենք կարող ունենալ՝ շնորհիվ այս իշխանությունների։ Սա կեղծ խաղաղություն է, որովհետև ապրել մի երկրում, որտեղ չկա մի կարգավիճակ, չկա որևէ բանակցային գործընթաց,կամ եթե կա, ապա վարողը քո երկրի ղեկավարները չեն, այլ այն երկրները, որոնք ի շահ իրենց պետության են վարում քաղաքականությունը։ Արդյունքում ստիպված ես դիտորդի դերում լինել, կրկին ի շնորհիվ այս իշխանությունների»,- ասաց նա։

Անդրադառնալով խաղաղ բնակիչների վրա ադրբեջանական կողմի կրակոցներին, Հակոբյանն ասաց, որ նոյեմբերի 9-ից հետո առաջին դեպքն էր, երբ ունեցանք քաղաքացիական զոհ։ Պատգամավորի խոսքով՝ պետք էր սպասել սրա։

«Արցախի հողատարածքները գտնվում են ընդամենը մի քանի մետրի վրա, որտեղ վխտում է թշնամին և այնտեղից հոխորտում է։Գյուղատնտեսական աշխատանքները,  բերքավաքը նաև ռուս խաղաղապահների օգնությամբ են անում, հատկապես՝ խաղողաքաղը, նռան բերքահավաքը, շուտով կսկսվի այլ մրգերի հավաքը։ Մարտունի, Ասկերանի և այլ կողմերից բնակիչներ նշում են, որ ամեն օր թշնամու վայրենիները մոտենում են ցանցին (ընդամենը ցանցով է բաժանված)և սկսում են աղմկել, գոռալ և հոխորտալ»,- ասաց Հակոբյանն ու նշեց, երբեմն ռուս խաղաղապահներին հաջողվում է հանդարտեցնել, երբեմն՝ ոչ։ Նրա խոսքով ՝ ահա այսպես են տևական ժամանակ Արցախում ընթանում բերքահավաքի աշխատանքները։