«Հրապարակ». ՀՀԿ-ԲՀԿ «ախպերությունը»

Մի երկրում, որտեղ սուտ ասելը վատ բան չի համարվում, և սուտ ասում են անգամ հասարակության կողմից ամենահարգված մարդիկ, կնշանակի կեղծիքի մթնոլորտ է տիրում ամենուր: Նախօրեին մամուլում լուր տարածվեց, թե Վայոց ձորի նախկին մարզպետը փորձել է միջամտել Արտաբույնք գեղեցիկ անունով գյուղում տեղի ունեցող ընտրությունների պրոցեսին, բախում է եղել, և միջադեպի արդյունքում ոստիկանությունը քրեական գործ է հարուցել: Ողջ օրը Սերգեյ Բագրատյանը չպատասխանեց լրագրողների հեռախոսազանգերին, իսկ երեկ արդեն խրոխտ ու ինքնավստահ հայտարարեց, թե դրանք սուտ տեղեկություններ են, այսպես ասած՝ հերյուրանքներ, որոնք իրականության հետ կապ չունեն: Մոտավորապես այսպես, լրագրողներն ու ինչ-որ չարակամներ նստել-մտածել են, թե ինչով վարկաբեկեն խեղճ մարդուն, և մի ֆանտաստիկ պատմություն են հորինել ընտրություններում նախկին մարզպետի հետաքրքրության, ապա իր թեկնածուին պաշտպանելու նպատակով ընտրատեղամասում առաջացած քաշքշուկի և ոստիկաններից մեկին գլխով խփելու մասին:

Այ, գլխով խփելու մասն ինձ հատկապես հետաքրքրեց: Փաստորեն, այս պատմությունը հորինողները լավ էլ ֆանտազիա ունեն, կարող են անգամ կրիմինալ սերիալների սցենար գրել' պիկանտ մանրամասներով, սուր տեսարաններով: Կարևորը, որ այդ տեսարանները «երջանիկ» ավարտ ունենան' պարզվի, որ ոչ քրեական գործ է հարուցվել, ոչ մարդիկ են պատժվել: Հարցը լուծվել է գեղական կարգով: Ասենք՝ ինչ-որ մեկը մտել է Վովայի մոտ, սա էլ խոսել է «շեֆի» հետ, և գործը փակել են: Դե, բարեկամ կուսակցության ներկայացուցչին հո չե՞ն նեղացնելու մի «թեթև» վեճի համար: Հետո, իհարկե, այս «ներողամտության» դիմաց մի բան կպոկեն: Ասենք՝ Գյումրիում ԲՀԿ-ից թեկնածու չի առաջադրվի: Կամ Ավանում կանցկացնեն հերթական հանրապետականին։