Ուկրաինայից ժամանած ռեժիսորը սիրահարվել է Քրիստինե Պեպելյանի լիրիկային

Այսօր երգչուհի Քրիստինե Պեպելյանը հրավիրել էր ասուլիս, որի ընթացքում ներկայացրեց սեպտեմբերի 28-ին կայանալիք իր մենահամերգի համար Ուկրաինայից հրավրված ռեժիսորների խմբին, ովքեր 2011-ին աշխատել են մանկական Եվրատեսիլի վրա։
Իդեպ, հենց այդ աշխատանքները և ծանոթությունները հիմք հանդիսացան հետագա նոր կապերի ստեղծման համար, որի արդյունքն այսօր Քրիստինե Պեպելյանի մենահամերգն է։

«Անսպասելի զանգ ստացա և առաջարկի համար շատ ուրախացա։ Այստեղ արդեն ծանոթացա հենց երգչուհու հետ, ու սիրահարվեցի նրա լիրիկային»,-նշում է ռեժիսորներից մեկը։

Երգերին ռեժիսորը ծանոթացել է համագործակցության առաջարկը ստանալուց հետո, և հենց դրանց հիման վրա է կառուցվել ողջ համերգը։ «Կլինեն ներկայացման տեսքով փոքրիկ համարներ՝ կախված երգերի բովանդակությունից, որոնք կընդգծվեն հետաքրքիր լուսային էֆեկտների օգնությամբ»։

Երգչուհին նախընտրել է չխառնվել ռեժիսորների աշխատանքին. «Ես իմ գործն եմ անում, նրանք՝ իրենց։ Այսպես ավելի հեշտ է դառնում արտիստի համար կենտրոնանալ երգերի և բենդի աշխատանքների վրա։ Չեմ կարծում, թե ճիշտ է խառնվել պրոֆեսիոնալների աշխատանքին, նրանք միանշանակ ավելի լավ գիտեն իրենց աշխատանքը»։

Մենահամերգից մի քանի ամիս անց՝ դեկտեմբերին արդեն պատրաստ կլինի Քրիստինե Պեպելյանի նոր ձայնասկավառակը։ Իսկ մենահամերգի ընթացքում կհնչի մոտ 22 երգ, որոնցից 5-ը նոր երգեր են։

«Դուետներ ևս կլինեն, սակայն այս անգամ դրանց թիվը կրճատել ենք՝ հասցնելով 3-ի։ Նշեմ, որ հետաքրքիր նոր զուգերգ է սպասվում հանդիսատեսին, այն իսկապես անակնկալ կլինի, քանի որ բոլորովին այլ ժանրի մեջ ենք լինելու թե՛ ես, թե՛ ինձ հետ երգող երգիչը, ում անունը չեմ ուզում բարձրաձայնել»,-հավելեց երգչուհին։ Նա նաև խոստովանեց, որ հակված է մենահամերգի ժամանակ արդեն հնչած և սիրված երգեր երգելուն, քանի որ սիրում է, երբ հանդիսատեսը ձայնակցում է իրեն։

Սիրված երգերի շարքում Քրիստինեն ևս ունի իր սիրելիները. «Թերևս կառանձնացնեմ երեք երգ՝ «Հրաժեշտը», որը դարձավ իմ այցեքարտն այս ասպարեզում, «Մայրիկը», որն ինձ համար ճակատագրական էր և, ըստ իս, իմ ամենահաջողված աշխատանքներից, և իմ վերջին երգերից «Շնորհակալ եմ» երգը, որի ազդեցությամբ էլ ընտրել եմ մենահամերգիս խորագիրը՝ «Շնորհակալ եմ...». այդ բառերն ինձ համար խորը և արժևորված իմաստ ունեն»։