Եղիա Ներսեսյան. Ասուլիսի ժամանակ մեզ ոչ մի առաջարկ չի եղել

Բնապահպանների կողմից օրեր առաջ համացանցում հայտնվել էր մի սկանդալային տեսանյութ, որում երևում էր «Խոսրովի անտառ» արգելոցում իրականացված բեզոարյան այծի, նապաստակի և արջի որսը: Երեկվանից բնապահպանության նախարարությունից խումբ է ուղարկվել «Խոսրովի անտառ» արգելոց՝ դեպքը բացահայտելու համար:

Lurer.com-ը Բնապահպանության նախարարության լրատվության բաժնից փորձեց ճշտել, թե որ փուլում են գտնվում որոնողական աշխատանքները, ինչին ի պատասխան մեզ ասացին, որ տեղում իրականացվում են աշխատանքները և այս պահին աշխատանքներին են միացել ոստիկանության աշխատակիցները: Նշվեց, որ հայտնաբերվել են նապաստակի մազմզուկները և հիմա շարունակվում է տեսանյութում առկա մյուս կենդանիների փնտրտուքը:

Մեր այն հարցին, թե աշխատանքներին օգնելու համար ինչու չեն դիմում տեսանյութի հեղինակներին, տրվեց հետևյալ պատասխանը.
«Ասուլիսի ժամանակ Բնապահպանության նախարարության աշխատակիցը դիմեց ակտիվիստներին՝ Մարիամ Սուխուդյանին և Եղիա Ներսեսյանին, խնդրելով, որ իրենք մեզ օգնեն տեղում գտնելու ու մյուս հարցերը պարզաբանելու համար, սակայն իրենք ուղղակի հրաժարվեցին: Այսօր ես նորից դիմել եմ Մերի Խաչատրյանին, սակայն նա ասաց, որ ինքը տեղում չի եղել, եղել են Եղյան ու Մարիամը ու իրենց կդիմի: Եղյան ասել էր, որ իրեն այսօր հարմար չէ»:

Մենք զրուցեցինք նաև բնապահպան-ակտիվիստ Եղիա Ներսեսյանի հետ, ով հերքեց այն փաստը, որ ասուլիսի ժամանակ իրենց խնդրել են օգնել որոնողական աշխատանքներին:

Մերի Խաչատրյանը հաստատեց, որ իրեն զանգահարել են Բնապահպանության նախարարությունից, ինչպես նաև՝ ՀՀ ոստիկանության քրեական հետախուզական վարչությունից ու ասել, որ ցանկանում են, որ տեսանյութի հեղինակները գնան ու ցույց տան տեղանքը։