Գագիկ Ջհանգիրյան. 10 սպանություններից մի քանիսը մի քանի օրում կարելի է բացահայտել

Ազգային ժողովի «Հայ ազգային կոնգրես» ընդդիմադիր խմբակցության պատգամավոր, նախկին զինդատախազ Գագիկ Ջհանգիրյանն այսօր լրագրողների հետ հանդիպման ժամանակ ներկայացրեց 2008թ. մարտի 1-ի սպանությունների բացահայտման գործով ժամանակավոր հանձնաժողով ստեղծելու մասին օրենսդրական նախաձեռնությունը:

«Նախագծի նպատակն է ժամանակավոր հանձնաժողովի միջոցով ուսումնասիրել և բացահայտել Երևանում մարտի 1-ից 2-ը կատարված սպանությունները, ինչպես նաև` ՀՀ ոստիկանության ու Գլխավոր դատախազության կազմակերպած միջոցառումների օրինականությունը: Քանի որ մենք չկանք գործադիր մարմնում կամ Գլխավոր դատախազությունում, հետևաբար մենք պետք է օգտագործենք այն լծակներն, ինչն ունենք»,-ասաց ՀԱԿ պատգամավորը:

Գագիկ Ջհանգիրյանը համոզմունք հայտնեց, որ 10 սպանություններից մի քանիսը մի քանի օրում կարելի է բացահայտել: Ջհանգիրյանը տեղեկացրեց նաև, որ հանձնաժողովում կարող է ընդգրկվել մեկական պատգամավոր յուրաքանչյուր խմբակցությունից, կարող են ընդգրկվել նաև անկախ պատգամավորներ:

«Իշխանություններն ամեն ինչ արել են՝ թաքցնելու համար այդ սպանությունները: Բայց չբացահայտել ինչպես 10 սպանությունները, այնպես էլ մի քանի մարդու հասցված մարմնական վնասվածքների դեպքերը, անհնարին է»,- ասաց նա՝ հավելելով. «Լավ, քաղաքացիական անձանց մարմնական վնասվածքը չեն ուզում բացահայտեն, բա զինծառայողներինը ինչո՞ւ չեն բացահայտում, դա էլ պատվի հարց պետք է լինի»:

Ջհանգիրյանը նշեց նաև, որ նախնական բանակցություններ ոչ մի խմբակցության հետ դեռ չեն վարվել: «Քանի որ բոլոր խմբակցությունները կողմ են այդ սպանությունների բացահայտմանը, կարծում եմ, որ նախագիծը կընդունվի»,- ասաց Ջհանգիրյանը: