Պոեզիայի երեկո՝ նոր ձևաչափով
Գիտություն և Մշակույթ
Դեկտեմբերի 12-ին Համազգային թատրոնում տեղի ունեցավ «Հայաստա′ն, անունդ տալիս» պոետական ներկայացումը։ Այն Հայաստանի երիտասարդական հիմնադրամի աջակցությամբ բեմադրել են «Սոմա» պոեզիայի թատրոնն ու Երևանի կինոյի և թատրոնի պետական ինստիտուտի ուսումնական թատրոնը։ Բեմադրիչը և հեղինակ-կատարողը «Սոմա» պոեզիայի թատրոնի գեղարվեստական ղեկավար Դավիթ Ասատրյանն է։
«Հայաստա′ն, անունդ տալիս» պոետական ներկայացումը հիմնված է պատմական պոեմների վրա (Վահագն Դավթյան` «Ճերմակ ձիավորը», Գեղամ Սարյան` «Փառքի տաճար», Գևերգ Էմին` «Սասունցիների պարը»): Ստեղծագործությունների ընտրությունը կատարվել է՝ հաշվի առնելով դրանց պատմական կարևորությունը և մեր հասարակության մեջ դրանց քիչ ընթերցված լինելը:
Ներկայացումը բեմադրված է մեկ դերասանի թատրոնի սկզբունքով՝ համեմված ազգային երգուպարով: Արտիստը նաև խոսակցական կոնտակտի մեջ է մտնում հանդիսատեսի հետ։ Երաժշտական կատարումները կենդանի հնչողությամբ են:
Ըստ Դավիթ Ասատրյանի, պոեզիայի երեկոները, երբ կանգնում են միկրոֆոնի մոտ և պաթոսով կամ ոչ արդարացված պաթոսով ասմունքում, սպառել են իրենց, և խնդիր է առաջանում պոեզիան բեմ տեղափոխել նոր ձևաչափով։ «Այս նոր ձևաչափը ներկայացվում է ազգային երգուպարով, փոքրիկ ներկայացումներով, քանի որ հանդիսատեսի համար դժվար է անընդմեջ լսել տեքստեր։ Սոմա պոետական թատրոնն իր առաջ խնդիր է դրել առաջին հերթին դասական գրողներին ներկայացնել այս ոճի մեջ»,- ասում է Դավիթ Ասատրյանը։
Երիտասարդ բեմադրիչը համամիտ չէ այն տեսակետին, թե այսօր հանդիսատեսն է թելադրում ինչ մատուցել իրեն. «Ո′չ, հանդիսատեսն ընկալում է այն, ինչ իրեն մատուցվում է։ Բարձրաճաշակ արվեստը կարող է կրթել ու դաստիարակել հանդիսատեսին։ Թե′ դրսից, թե′ ներսից մեզ պարտադրվող համատարած աղբի կողքին անպայման պետք է դասական արվեստը ներկայացվի։ Օրինակ, Բալահովիտի դպրոցում մենք պոեզիա ենք կարդացել, և պետք էր տեսնել այնտեղ նստած երեխաների հրաշք աչքերը, որ հիացմունքով նայում էին մեզ։ Այդ երեխաները նորմալ արվեստ չեն տեսել, բայց պարզվում է՝ սիրում ու հասկանում են այն, ինչ գեղեցիկ է ու ազգային»։
Նշենք, որ «Սոմա» թատրոնը հիմնադրել են պոեզիան ու բեմը սիրող մի խումբ երիտասարդներ։ Այն երեք տարվա կենսագրություն ունի և ներկայացումներով հանդես է գալիս ոչ միայն մայրաքաղաքում, այլև մարզերում։
ՈՒՂԻՂ ԵԹԵՐ
Ամենադիտված 
Դիրքում բռնшբшրnւթյшն դեպքը տեսած, ապա սպшնված 3 զինվորների ծնողներն արդարադատություն են պահանջում (տեսանյութ)
