ՀՀ ԱԺ նախագահն ընդունեց ԱՄՆ ՄԶԳ Հայաստանի գրասենյակի տնօրենին

Սեպտեմբերի 26-ին ՀՀ ԱԺ նախագահ Հովիկ Աբրահամյանն ընդունեց ԱՄՆ Միջազգային զարգացման գործակալության Հայաստանի գրասենյակի տնօրեն Քարեն Հիլիարդին:

Շնորհավորելով տիկին Հիլիարդին ԱՄՆ Միջազգային զարգացման գործակալության հայաստանյան առաքելության ղեկավար նշանակվելու կապակցությամբ՝ Հովիկ Աբրահամյանը կարեւորեց եւ արդյունավետ գնահատեց գործակալության գործունեւությունը Հայաստանում: ԱԺ նախագահի խոսքով՝ Հայաստանում քսանամյա գործունեության ընթացքում ԱՄՆ ՄԶԳ ծրագրերը զարգացել են եւ զուտ մարդասիրական օժանդակությունից վերածվել երկարաժամկետ տնտեսական զարգացման, կայուն սոցիալական քաղաքականության եւ ժողովրդավարական բարեփոխումների խթանման ծրագրերի: Հովիկ Աբրահամյանը բարձր գնահատեց ԱՄՆ ՄԶԳ - ՀՀ ԱԺ համագարծակցությունը եւ կարեւորեց դրա շարունակականությունը՝ նշելով, որ իր կողմից կանի հնարավորը ծրագրին աջակցելու ուղղությամբ:

Քարեն Հիլիարդը համոզմունք հայտնեց, որ Հայաստանի խորհրդարանի հետ փոխգործակցությունը այսուհետ եւս կլինի արդյունավետ եւ նշեց, որ իր նպատակն է ոչ միայն պահպանել առկա համագործակցության մակարդակը, այլ էլ ավելի զարգացնել ու խորացնել այն: Նա նշեց, որ ԱԺ-ի հետ իրականացվելու է փոխգործակցության քառամյա ծրագիր, որն ուղղված է լինելու խորհրդարանի կարողությունների հզորացմանը, մասնավորապես՝ մշտական հանձնաժողովների:

Հանդիպմանը քննարկվեցին հետագա համագործակցությանն առնչվող այլ հարցեր եւս: