Միջին մասնագիտական կրթությունն ավելի գրավիչ է դարձել

Ավելի քան վեց տարի է, որ ՀՀ կրթության և գիտության նախարարությունը և ՄԱԿ-ի Զարգացման ծրագրի հայաստանյան գրասենյակի մասնագիտական կրթության և ուսուցման /ՄԿՈւ/ ծրագիրն իրականացնում են համապարփակ նախաձեռնություն՝ ուղղված Հայաստանի նախնական և միջին մասնագիտական ոլորտի ընթացիկ բարեփոխումներին: Այսօր ներկայացվել են նշված ծրագրի երկու տարվա աշխատանքի արդյունքները, այն է՝ ՀՀ կրթության և գիտության նախարարության և ՄԱԿ-ի Զարգացման ծրագրի հայաստանյան գրասենյակի կողմից մշակված և տպագրված մասնագիտական 12 ձեռնարկների շնորհանդեսը, որին բացման խոսքով հանդես են եկել ՀՀ կրթության և գիտության նախարար Արմեն Աշոտյանը և Հայաստանում ՄԱԿ-ի մշտական համակարգող, ՄԱԶԾ մշտական ներկայացուցիչ Դաֆինա Գերչևան:

«Խոստովանենք, որ նախնական և միջին մասնագիտական կրթությունը երկար տարիներ հանրակրթության և բարձրագույն կրթության կողքին դիտվել է որպես խորթ զավակ: Բայց վերջին տարիներին նախարարության որդեգրած քաղաքականության և բազմաթիվ միջազգային գործընկերների ներգրավվածության շնորհիվ մենք կարողացել ենք արձանագրել շոշափելի փոփոխություններ: Մասնավորապես, բարեփոխումների շնորհիվ մի քանի տասնյակ հաստատություններում իրականացվել են համապատասխան վերազինումներ և վերանորոգումներ, վերապատրաստվել են հազարավոր մասնագետներ, վերանայվել են տասնյակ կրթական ծրագրեր: Միաժամանակ նշեմ, որ նախարարությունը մեծ ուշադրություն է դարձնում կրթական ուսումնական նյութերի ստեղծան գործին. այսօրվա աշխատանքի ներկայացումը մեր հերթական, բայց ոչ վերջին հաջողությունն է: Դեռ ուսումնական բովանդակության, կրթական ծրագրերի, նյութերի ստեղծման և մի շարք այլ չլուծված խնդիրներ ունենք»,-բացման խոսքում նշել է Արմեն Աշոտյանը՝ հավելելով, որ այն հանգամանքի շնորհիվ, որ ՀՀ կառավարության որոշմամբ վերացվել են ընդունելության քննությունները, պետական պատվերն ավելացել է հիսուն տոկոսով, լավագույն միջազգային փորձն է ներդրվել Հայաստանում, միջին մասնագիտական կրթության ոլորտն ավելի գրավիչ է դարձել երիտասարդների համար: Նախարարը նաև տեղեկացրել է, որ այս տարի մոտ ութուկես հազար երիտասարդ է ընդունվել նախնական և միջին մասնագիտական ուսումնական հաստատություններ: Մոտակա տարիներին ևս, ըստ Արմեն Աշոտյանի, ՀՀ կառավարության կողմից նշված բնագավառը դիտարկվելու է որպես գերակա ոլորտ: «Ոլորտը նորից սկսել է շնչել: Ոլորտը հույսեր է տալիս, որ դառնալու է Հայաստանի տնտեսական, կրթական մրցունակության, աշխատաշուկա-կրթություն կապն ամրապնդող առաջատարներից մեկը: Հուսով եմ, որ հետագայում նման նյութեր լույս կընծայվեն ոչ միայն նախանշված մասնագիտությունների, այլև ՀՀ-ում գրանցված բոլոր մասնագիտությունների համար»,-նշել է Արմեն Աշոտյանը՝ շնորհակալություն հայտնելով ՄԱԿ-ին և անձամբ տիկին Գերչևային՝ հուսալի գործընկերության համար:

«Այս 12 նոր ձեռնարկները՝ մշակված համաձայն վերջերս վերանայված պետական որակավորման չափորոշիչների, ՄԿՈւ ոլորտի ուսանողներին հնարավորություն կընձեռի ավելի ճկուն լինել մասնագիտություն ընտրելիս՝ ըստ իրենց որակավորման և աշխատանքի փորձի: Նմանատիպ միջին մասնագիտական ուսուցումը թույլ է տալիս տարբեր տարիքի և մասնագիտություն ունեցող ուսանողներին զարգացնել ոչ միայն իրենց գիտելիքները, այլ նաև հարստացնել իրենց հմտությունները՝ համաձայն աշխատաշուկայի պահանջարկի»,- իր հերթին նշել է Հայաստանում ՄԱԿ-ի մշտական համակարգող, ՄԱԶԾ-ի մշտական ներկայացուցիչ Դաֆինա Գերչևան:

Շնորհանդեսի ընթացքում ներկայացվել են ՄԿՈւ ոլորտի՝ գյուղատնտեսության, շինարարությանը, զբոսաշրջության, վերամշակման, գինեգործության, թեթև արդյունաբերության, ի թիվս այլոց, մասնագիտական ձեռնարկները՝ համալրված համապատասխան դասախոսի ձեռնարկներով: Հայերեն լեզվով 12 ձեռնարկները համապատասխանում են մոդուլային ծրագրով նախատեսաված գործնական և մասնագիտական դասավանդման համար՝ հիմք ընդունելով հանրապետության տնտեսության ճյուղերի զարգացումը: Նշված ձեռնարկները հիմնականում վերաբերում են տեխնիկական մասնագիտություններին, որոնք մեծ պահանջարկ ունեն ներկայիս աշխատաշուկայում և միտված են գործնական հմտությունների ձեռքբերմանը: Զուգահեռ այս 12 ձեռնարկների մշակման և տպագրման աշխատանքներին՝ ՄԱԶԾ-ն նախաձեռնել է նաև հայերեն լեզվով ՄԿՈւ ոլորտի էլեկտրոնային ուսուցման առարկաների մշակումը՝ որպես առաջին փորձ ներկայացնելու թվային ուսուցման մեթոդները ՄԿՈւ ոլորտում:

Յուրաքանչյուր ձեռնարկ տպագրվել է 1000 օրինակով, որոնք կբաժանվեն համապատասխան ՄԿՈւ հաստատությունների գրադարաններին՝ հարստացնելու և համալրելու առկա մասնագիտական գրականությունը: Միևնույն ժամանակ, ձեռնարկների էլեկտրոնային տարբերակները, որպես բաց և անվճար տեղեկատվության աղբյուր, կտեղակայվեն ՄԱԶԾ ՄԿՈւ կայքում՝ www.vet.am՝ առկա նյութ ՄԿՈւ ոլորտի թե ուսանողների, և թե դասախոսների համար՝ ապահովելով կրթության ոլորտի համաշխարհային սկզբունքներից մեկը՝ մատչելիությունը:
Նորաստեղծ ՄԿՈւ ուսումնաարդյունաբերական արհեստանոցները՝ հագեցված ժամանակակից լաբորատոր սարքավորումներով, որոնք ձեռք են բերվել ՄԿՈՒ ծրագրի շրջանակում ավելի քան 20 ՄԿՈւ հաստատությունների համար, համահունչ են նոր տպագրված ձեռնարկներին, որը հիանալի հնարավորություն է ընձեռում համակցելու գործնական պարապմունքները մասնագիտական դասախոսությունների հետ՝ ձեռք բերելով արդի գիտելիքներ բազմաթիվ մասնագիտությունների գծով:

Ավելին՝ ՄԱԶԾ ՄԿՈւ ծրագիրը նախատեսում է իրականացնել կարճաժամկետ դասընթացներ ՄԿՈւ ոլորտի հաստատությունների համապատասխան դասախոսների համար՝ ձեռնարկների բովանդակությունը լիովին ընկալելու և ճիշտ հասցեագրելու նպատակով: