Թուրքիայի ԱԳ նախարարը խոսել է Հայաստանի հետ հարաբերությունների կարգավորման մասին

Թուրքիան ակտիվորեն շփվում է Ռուսաստանի հետ բազմաթիվ արդիական հարցերի շուրջ, այդ թվում՝ Սիրիայում, Լիբիայում և Ղարաբաղում իրավիճակով։ Կան դիրքորոշումների տարբերություններ, սակայն կողմերը հավատարիմ են մնում կառուցողական երկխոսության՝ ազգային շահերից բխող զգայուն հարցերի փոխադարձ նկատառմամբ։ Դա, մասնավորապես, վերաբերում է Ուկրաինային։

Ինչպես գրում է «Անադոլու» գործակալությունը, այս մասին հինգշաբթի Անկարայում խորհրդարանական պլանավորման և բյուջեի հանձնաժողովի նիստում հայտարարել է Թուրքիայի արտգործնախարար Մևլութ Չավուշօղլուն։

Նա ընդգծել է, որ «Թուրքիան չի ճանաչում և չի ճանաչելու Ղրիմի անօրինական բռնակցումը և շարունակելու է վերահսկել Ղրիմի թաթարների անվտանգությունն ու բարեկեցությունը»։

Անդրադառնալով Հարավային Կովկասում տիրող իրավիճակին՝ Չավուշօղլուն նշել է, որ տարածաշրջանում փոփոխությունների ու վերափոխումների հույս կա։ Ըստ նրա` պատերազմի ավարտից հետո «տարածաշրջանը երկարաժամկետ խաղաղության պատմական հնարավորություն է ստացել»։

Միաժամանակ նա նշել է, որ Անկարան պատրաստ է Երևանի հետ հարաբերությունների կարգավորման գործընթացին։

«Մենք հուսով ենք, որ Հայաստանը կօգտագործի այս հնարավորությունը տարածաշրջանում խաղաղության և զարգացման համար»,- ասել է թուրք դիվանագետը։