Բայրամովն անդրադարձել է Ալիևի և Նիկոլ Փաշինյանի հնարավոր հանդիպմանը

Հայաստանի եւ Ադրբեջանի միջեւ մի շարք հարցեր կան, որոնք վերաբերում են հետկոնֆլիկտային շրջանին։ Այս մասին հայտարարել է Ադրբեջանի ԱԳ նախարար Ջեյհուն Բայրամովը, փոխանցում է ԱՊԱ-ն։

«Դա ե՛վ տրանսպորտային հաղորդակցությունների ապաշրջափակումն է, ե՛ւ հայ-ադրբեջանական պետական սահմանի սահմանագծումն ու սահմանազատումը։ Կան պետությունների միջեւ սահմանների որոշման որոշակի կանոններ, եւ դա պետք է տեղի ունենա։ Կան այդ կապակցությամբ բազմաթիվ նախաձեռնություններ եւ այլ մարդասիրական հարցեր, ականապատ դաշտերի քարտեզների տրամադրում։ Ադրբեջանական կողմը երբեք չի հրաժարվել բանակցություններից։ Մեր դիրքորոշումը արդար է, հիմնված միջազգային իրավունքի վրա։ Մենք պատրաստ ենք կարգավորել հարաբերությունները երկրների ինքնիշխանության, տարածքային ամբողջականության եւ սահմանների անձեռնմխելիության հիման վրա։ Եթե դրա համար ինչ-որ հանդիպում է հարկավոր, մենք բաց ենք այդ հանդիպումների անցկացման համար»,-ասել է նա։

Բայրամովը նաև հայտնել է, թե տեղեկություն չունի Իլհամ Ալիևի և Նիկոլ Փաշինյանի հնարավոր հանդիպման մասին։
 
Միաժամանակ նախարարը չի բացառել, որ ապագայում հնարավոր են նման հանդիպումներ։

Հիշեցնենք, որ նախօրեին Հայաստանի վարչապետի գրասենյակից եւս հայտնել էին, որ տեղեկություն չունեն Ալիեւի եւ Փաշինյանի հնարավոր հանդիպման մասին։